काठमाडौँ ,२६ साउन । राजधानीमा पछिल्लो समय विभिन्न संघसस्थाले भ्रमपूर्ण बिज्ञापन दिएर ग्राहक तथा उपभोक्ता ठग्दै आएका छन् । संस्थाको बोर्ड पनि नराखि केही कर्मचारी राखेर ती संस्थाहरुले वर्षौदेखि ठग्दै आएपनि सम्बन्धित निकाय भने मौन रहेको छ । उनीहरुले विभिन्न संचारमाध्यममा विज्ञापन नै गरेर सर्वसाधारणलाई ठगी गर्ने भाँडोको रुपमा लिएका छन् । मोटोपन बढाउने वा घटाउने औषधी,लिङ्ग बढाउने र योनीको आकार सानो बनाउने तथा पेटको धर्सा हटाउने भन्दै उनीहरुले ठगी गरिरहेका छन् । देशमा बेरोजगारी बढ्दै गएको बेलामा कैयन संस्थाले यस्ता बेरोजगारी ठग्ने धन्दा चलाएका छन्। तर यसमा प्रहरी प्रशासनले निगरानी बढाउन नसक्दा दैनिक कैंयन युवा ठगिन बाध्य भएका छन्। यस्ता संस्थाले दिएका विज्ञापन सञ्चारमाध्यमले सत्यतथ्य नबुझि विभिन्न विज्ञापन निकालेर बेरोजगारी ठग्न प्रोत्साहित गरेको जानकारहरु बताउँछन् । टेलिसप तथा विभिन्न आयुर्वेदिक पसलमा अहिले छ्याप्छ्याप्ती रुपमा लिङ्ग बढाउने, हाइट बढाउने, मोटोपन बढाउने वा घटाउने, योनीको आकार घटाउने खालका औषधीहरु पाइन्छन् ।