काठमाडौँ २३ पौष -ललितपुर जिल्ला अदालतले पत्नीलाई कुटपिट र मानसिक पीडा दिने एक पतिलाई अन्तै डेरा खोजेर राख्न प्रहरीलाई आदेश दिएको छ।

नुवाकोट विदुर गाविस घर भई ललितपुरको किटनी गाविस वडा नम्बर १ बस्ने गजेन्द्रबहादुर थापाले पत्नीमाथि हिंसा गरेको भन्दै मुद्दा परेपछि अदालतले यस्तो आदेश दिएको हो।
जिल्ला न्यायाधीश टेकनारायण कुँवरको इजलासले, पिडक (गजेन्द्र) र पीडित (उनकी पत्नी) लाई एकै ठाँउमा वसोबास गर्न उपयुक्त नदेखेमा पतिलाई नै अलग बस्ने व्यवस्था गर्न प्रहरीलाई आदेश दिएको हो।
महिला प्रहरी पनि समावेश भएको प्रहरी अधिकृतको नेतृत्वमा ३ जना प्रहरी खटाएर आदेश कार्यान्वयन गराउन अदालतले भनेको छ। सो आदेश जिल्ला प्रहरी प्रमुखलाई लेखी पठाउन प्रसाशनलाई निर्देशन दिएको छ। पिडितलाई सुरक्षा दिनुपर्ने देखिएको भन्दै इजलासले एकमहिना सम्म दिनको एकपटक उनी बसेको ठाँउमा गएर निरिक्षण गर्न प्रहरी टोलीलाई अादेश दिएको छ। प्रहरीले प्रत्येक सात दिनमा निरिक्षणको प्रतिवेदन अदालतलाई बुझाउनुपर्ने छ।
आदेश अनुसार, पहिले प्रहरीले उनीहरु बस्ने ठाँउमा गई पतिपत्नी सँगै बस्न सहजिकरण गर्ने र सँगै बस्ने अवस्था नदेखेमा पतिलाई अन्तै बस्नको लागि डेरा खोज्दीनुपर्नेछ।
पति पत्नीसँगै नबस्ने अवस्था आएमा कुनै पनि माध्यमबाट दुःख नदिन थापालाई आदेश दिएको छ। फोन तथा इन्टरनेट प्रयोग गरेर पनि दुःख नदिन उनलाई अदालतले भनेको छ।
जिल्ला अदालतले थापाका नाममा अन्य ५ बुँदे आदेश समेत जारी गरेको छ।
पीडितलाई बस्दै आएको घरमा बस्न, खान, लाउन दिन, कुटपीट नगर्न, शिष्ट र सभ्य व्यवहार गर्न थापालाई अदालतले भनेको छ। गाली वेइज्जती, धम्की नदिन र असभ्य व्यवहार नगर्न अदालतले भनेको छ।
आजसम्म दिएको पीडाबाट शारीरिक वा मानसिक चोट पुगेको भएमा उचित उपचार गराउन वा उपचारको लागि चाहिने रकम दिन पनि अदालतले थापालाई आदेश दिएको छ।
यी सबै आदेशहरु कार्यान्वयन गराउन वा अन्य आवश्यक र उपयुक्त व्यवस्था गर्न अदालतले प्रहरीलाई भनेको छ।
थापा पत्नीले आइतबार आफ्ना पति विरुद्ध घरेलुहिंसाको मुद्दा दायर गरेकी थिइन्। शारीरिक र मानसिक यातना दिएकोले आफ्ना पतिलाई कारवाही र आफूलाई संरक्षण दिन अदालत समक्ष उनले माग गरेकी थिइन्।
अदालतले उनको मुद्दा भोलिपल्टै पेशीमा राखेको थियो।
अदालतका प्रवक्ता गोसलेश्वर ज्ञवालीले घरेलु हिंसा सम्बन्धी मुद्दा गम्भीर प्रकृतिको भएकाले निरन्तर सुनुवाई गर्न भोलिपल्टै पेशी तोकिएको बताए।