धेरै मान्छेलाई थाहा छैन कि चुम्बन गर्दा ब्याक्टेरियाको एउटा ठूलो समुह शरणार्थी बनेर दोस्रो व्यक्तिको मुखभित्र प्रवेश गर्छ भन्ने । तर वैज्ञानिकहरूले १० सेकेण्डको एक चुम्बनमा आठ करोड ब्याक्टेरिया एक अर्काको मुखमा ओहोर–दोहोर गर्ने तथ्य फेला पारेका छन् ।

यो कुनै अनुमान होइन, नेदरल्याण्डका वैज्ञानिकको एक समूहले पत्ता लगाएको तथ्य हो ।

वैज्ञानिकहरुको एक समूहले २१ जोडीको चुम्बनमाथि अनुसन्धान गरेका थिए । अनुसन्धानका क्रममा दिनमा नौ पटक चुम्बन गर्ने व्यक्तिको र्‍यालबाट अत्यधिक रुपमा ब्याक्टेरिया ओहोर–दोहोर गर्ने गरेको पाइएको थियो ।

अध्ययन अनुसार, मान्छेको मुखमा ७ सय प्रकारका ब्याक्टेरिया करोडौंको संख्यामा हुन्छ । तीमध्ये केही असाध्यै छिटो ट्रान्सफर हुने खालका हुन्छन् ।

कसरी भएको थियो अध्ययन ?

डच वैज्ञानिकको यो अध्ययन जर्नन माइक्रोबिओममा सन् २०१४ मा छापिएको थियो । नेदरल्याण्ड अर्गनाइजेशन फर एप्लाइड साइन्टिफिक रिसर्च (टीएनओ) को समूहले एक जोडीको चुम्बन बानीवारे सोधपुछसमेत गरेका थिए ।

यसमा एउटा महत्त्वपूर्ण प्रश्न सोधिएको थियो– गएको वर्ष कतिपटक एक–अर्कालाई चुम्बन गरेका थिए ?

साथै अन्तिम पटकको लिप्सवाला चुम्बन कहिले भएको थियो भनेर पनि सोधेका थिए ।

वैज्ञानिकले एक जोडीको जिब्रोको स्याम्पल पहिल्यै लिएका थिए । यसपछि उसको पार्टनरलाई प्रोबायोटिक ड्रिंक पिउन दिइएको थियो । जसको मद्दतले सजिलै ब्याक्टेरियाको पहिचान गर्न सजिलो हुन्थ्यो ।

यसपछि चुम्बनको क्रममा कसरी ब्याक्टेरिया एकअर्काको मुखमा ओहोर–दोहोर गर्छ, पत्ता लागेको थियो । १० सेकेण्डमा करिब ८ करोड ब्याक्टेरिया ओहोर–दोहोर गरेको पत्ता लागेको थियो ।

यस टिमका प्रमुख प्रोफेसर रेमको कोर्टले भनेका छन्, ‘फ्रेञ्च चुम्बनमा ब्याक्टेरिया छिटो र धेरै संख्यामा एक अर्काको मुखमा प्रवेश गर्छन् । यो अध्ययनले ब्याक्टेरियासँग सम्बन्धित समस्या समाधान गर्न सहयोग पुग्ने विश्वास गरिएको छ ।

डच वैज्ञानिकको यो अध्ययन एमस्टर्डमस्थित ब्याक्टेरियाको दुनियाँको पहिलो म्युजियमको सहयोगमा गरिएको थियो ।