चितवन ।  चितवन राष्ट्रिय निकुञ्जमा पर्यटकको सङ्ख्यामा उल्लेखनीय वृद्धि भएको छ।  निकुञ्जका कार्यालयका अनुसार, गत आर्थिक बर्षको पहिलो चार महिनाको तुलनामा यस वर्षको सोहि अबधिमा दोब्बरभन्दा बढीले पर्यटक सङ्ख्यामा वृद्धि भएको हो।

गत आर्थिक बर्षको पहिलो चार महिनामा १८ हजार १३८ जना पर्यटक निकुञ्ज भित्रिएका थिए भने चालु आर्थिक बर्षको सोहि अबधिमा ३८ हजार ६०४ जना पर्यटक भित्रिएको छ ।

पर्यटकको सङ्ख्यामा वृद्धि भएसँगै राजस्वमा समेत वृद्धि भएको छ। चालु आवको चार महिनामा रु छ करोड ११ लाख छ हजार ४६० राजस्व सङ्कलन भएको छ । गत आवको सोही अवधिमा दुई करोड ४९ लाख ३४ हजार मात्रै राजस्व सङ्कलन भएको थियो।

यस वर्षको कात्तिक महिनामा मात्र दुई करोड ३५ लाख ७९ हजार ४४ राजस्व सङ्कलन भएको छ । जुन गत आवको चार महिनाको राजस्व बराबर हुन आउँछ।

त्यसैगरी यस अवको असोजमा एक करोड ५० लाख ४२ हजार ५२८, भदौमा रु ९६ लाख ५२ हजार ५३ र साउन महिनामा रु एक करोड २८ लाख ३२ हजार ८३४ राजस्व सङ्कलन भएको निकुञ्जले जनाएको छ।