मकरराज धामी÷बझाङ । बझाङका स्थानीय वासिन्दामा दुध बेच्नु हुँदैन भन्ने मान्यता विस्तारै हट्न थालेको छ । गाईभैसीको दुध बजारमा विक्री गर्दा गाईभैैसीले दुध दिदैन भन्ने मान्यता विस्तारै हट्न थालेको हो । कोटदेबल गाविस–१ रनाडाका स्थानीय कृषकहरूले आजभोलि दुध विक्री गरेर नै घरखर्च चलाइरहेका छन् । स्थानीयहरूमा गाईभैसीको दुध बेच्नु हुँदैन भन्ने मानसिकता थियो, तर अहिले दुध बिक्री गर्न थालेको स्थानीय धनलक्ष्मी द्वावलले बताईन । दुध बिक्री गर्दा र महिनावारी भएका बेला महिलाले गाईभैसीको दुध खाएको खण्डमा देवता रिसाउछन् भन्ने मान्यता बझाङमा विद्यामान छ । यूएमएनको आर्थिक सहयोग र महिला कल्याण बचत तथा ऋण सहकारी संस्थाको सहकार्यमा गाउँमै गएर विभिन्न जनचेतनामूलक कार्यक्रम सञ्चालन गरिएपछि दुध बिक्री गर्न थालिएको हो । महिला कल्याण बचत तथा ऋण सहकारी संस्थाको सहकार्यमा गाउँमै दुध संकलन केन्द्र स्थापना गरिएको हो ।