काठमाडौं । ठमेल पर्यटन विकास परिषद्को आसन्न साधारण सभाका विषयलाई लिएर परिषद् सम्बद्ध केही व्यक्तिहरुले अर्नलग प्रचारबाजी गरेको भन्दै परिषद्ले आफ्नो गम्भीर ध्यानाकर्षण भएको जनाएको छ । केहीदिन अघि राजधानीमा पत्रकार सम्मेलन गरी व्यक्ति विशेषका लागि परिषद्का अध्यक्षले विधान संशोधन गर्न खोजेको आरोप लगाएको भन्दै अध्यक्ष रामशरण थपलियाले यसप्रति आपत्ति जनाउनुभएको हो । 

भोलि असोज २ गते परिषद्को २१ औं र २२ औं साधारण सभा आफूहरुले विधानसम्मत ढंगले नै गर्न लागेको भन्दै अध्यक्ष थपलियाले साधारणसभा भाँड्ने ढंगबाट यस्ता गतिविधि गरिनु अत्यन्तै खेदजनक भएको बताउनुभयो । ठमेल पर्यटन विकास परिषद्मा आफू अध्यक्ष भएर आएको करिब ३ वर्षमा ठमेल क्षेत्रमा सञ्चालित व्यवसायलाई व्यवस्थित ढंगले सञ्चालन गर्न तथा त्यहाँको भौतिक तथा पूर्वधार विकासका लागि आफूले कुनै कसर बाँकी नराखेको उहाँले बताउनुभयो । यद्यपि केही व्यक्तिले आफूलाई विकास विरोधी भनेर प्रचारबाजी गरिनु दुःखद भएको अध्यक्ष थपलियाको भनाई छ । यस्ता गतिविधिले सिँगो ठमेलको इज्यत र प्रतिष्ठासँग जोडिएको परिषद्कै बद्नाम गर्न खोजिएको परिषद् अध्यक्षको भनाई छ । अध्यक्ष थपलियाले आफूलाई कार्यकाल लम्ब्याउन खोजेको अभिव्यक्ति दिएर केही समूहले साधारण सभा हुन नदिने षड्यन्त्र गरेको बताउनुभयो । यस्ता भ्रमको पछि नलागी परिषद् सम्बद्ध सबै सदस्यहरुलाई अनिवार्य रुपमा साधारण सभामा उपस्थित हुन र साधारण सभामै स्वतन्त्र ढंगले आफ्नो विचार राख्न सबै साधारण सदस्यहरुलाई अनुरोध गर्नुभयो । आफू परिषद्को अध्यक्ष बनेपछि ठमेलमा विकास निर्माण तथा सुधारका काम तीव्र गतिमा अघि बढिरहेको र यसका कारण ठमेललाई राष्ट्रिय र अन्र्तराष्ट्रिय समुदायले हेर्ने दृष्टिकोणमा सकारात्मक परिवर्तन आएको उहाँको भनाई छ । ठमेल क्षेत्रमा अहिले पनि कतिपय विकास निर्माणका कामहरु निरन्तर रुपमा अघि बढिरहेको भन्दै थपलियाले आफ्ना विषयमा भै रहेका झूठा प्रचारबाजीका पछाडि कुनै सत्यता नभएको बताउनुभयो । यस्ता अनावश्यक प्रचारबाजीले व्ययवासी, ठमेलबासी तथा समग्र ठमेलकै इज्यत र प्रतिष्ठामाथि आँच आउने काम गरेको भन्दै उहाँले धमिलो पानीमा माछा मार्ने यस्ता तत्वहरुदेखि सजग र सतर्क रहन सबैलाई विशेष आग्रह गर्नुभएको छ । उहाँले परिवर्तित समय अनुसार ठमेल पर्यटन विकास परिषद्लाई आवश्यक पर्ने काम कारबाही गर्न हालको विधान अपूर्ण भएकोले विधान संशोधन गर्न लागिएको तर यसमा व्यक्तिगत स्वार्थ तथा कार्यकाल बढाउने कुनै उद्देश्य नरहेको स्पष्ट पार्नुभएको छ । विधान मस्यौदा समिति गठन भएर सो समितिले विधानलाई कार्यसमितिमा ल्याएको सन्दर्भमा कार्यसमितिबाट विधान साधारणसभामा पेश गर्ने कानुनी प्रक्रिया रहेको अवस्थामा साधारण सभा अघि नै केही व्यक्तिले आफूहरुलाई विधान संशोधनको बारेमा जानकारी छैन भनेर प्रचारबाजी गर्नु हास्यास्पद भएको उहाँले बताउनुभयो ।