भेडेटार। भेडेटार घुमेर फर्किएका भारतीय पर्यटक बोकेको गाडी दुर्घटनामा परेको छ। दुर्घटनामा एक जनाको मृत्यु हुनुका साथै पाँच जना घाइते भएका छन्।
भेडेटार चोक नजिक भएको दुर्घटनामा बि।आर.४३ पि ४२२२ नम्बरको स्कोरपियो मध्याह्न कोशी राजमार्गदेखि डेढ सय मिटर तल खसेको थियो। दुर्घटनामा परी बिहार राज्यको मध्यपुरा जिल्लाका ३८ वर्षीय सुरज सिंहको घटनास्थलमै मृत्यु भएको छ। घाइते ५ मध्ये दुई जना नेपाली युवती छन्। घाइतेहरुमा ३२ वर्षीय चालक राजुकुमार सिंह, २२ वर्षीय रोहित कुमार र ३१ वर्षीय प्रभाकर कुमार छन्।
जिल्ला ट्राफिक प्रहरी कार्यालय सुनसरीका अनुसार भारतीय पर्यटकसँगै दुर्घटनामा घाइते दुई नेपाली युवतीहरुले ठेगाना झापा गौरदह १ बताएका छन् । उनीहरुले आफ्नो प्रिति र सुनिता राई बताए पनि वास्तविक परिचय, ठेगाना भने खुलेको छैन। दुवैले भेडेटारमा लिफ्ट मागेर चढेको प्रहरीलाई बयान दिएका छन्। उनीहरुको अवस्था सामान्य छ।
घाइतेहरुलाई धरानमा उपचार भइरहेको छ। गाडी तीब्र गतिमा हुइकिएर अनियन्त्रित भएर खसेको अनुमान प्रहरीले लगाएको छ।