थाइल्याण्ड । थाइल्याण्डको बैंककमा रहेको नेपाली दूतावास अब आफ्नै भवनमा सर्ने भएको छ। बैंककको सुकुम्भित रोड– ७१ मा अवस्थित चार रोपनी जग्गा र सो जग्गामा बनेका तीनवटा घर किनेपछि दूतावास आफ्नै भवनमा बस्न लागेको हो। बैंककस्थित नेपाली दूतावासले उक्त जग्गा र घरको मूल्य १५ करोड भाट अर्थात करिब ४५ करोड रुपैयाँ परेको विज्ञप्ति मार्फत जनाएको छ।
बैंककमा नेपाली दूतावास स्थापना भएदेखिनै कार्यालय र कर्मचारीहरु भाडाको घरमा बस्दै आएका थिए। नयाँ ठाउँमा राजदूतावास कार्यालय, भिसा कार्यालय र कर्मचारीको निवास बनाउने तयारी भइरहेको दूतावासले जनाएको छ। तीन वटा घरमा रंगरोगन गरी छिटै नै दूतावास आफ्नै भवनमा सर्ने दूतावासको विज्ञप्तिमा जनाइएको छ।