३०२ फिट लामो एयरल्याण्डर १० जहाज विश्वमा अहिले उडानमा रहेको सबैभन्दा लामो जहाज भन्दा ६० फिट लामो छ । यो जहाजको उचाई ८५ फिट अर्थात् २६ मिटर रहेको छ । बेलायती कम्पनी हाइबि्रड एयर भेइकल्सले निर्माण गरेको यो जहाज आकाशमा लगातार ३ हप्तासम्म उडिरहन सक्छ र १ सय ४८ किलोमिटर प्रतिघण्टाको गतिमा उड्न सक्छ ।

विश्वमा अहिलेसम्मकै सबैभन्दा ठूलो आकारको भनिएको जहाज एयरल्याण्डर १० का तस्वीर सार्वजनिक गरिएको छ । आधिकारिक रुपमा जहाजको अनावरण तथा यसको परीक्षण उडानको पूर्वसन्ध्यामा यो भिमकाय जहाजका तस्वीरहरु सार्वजनिक भएका हुन् ।

बेलायतको बेडफोर्डशायरस्थित प्रथम विश्वयुद्धकालको विमानशालामा राखिएको यो विमान आधिकारिक रुपमा सोमबार अनावरण गरिनेछ । आगामी केही दिनभित्रमा यसले परीक्षण उडान गर्नेछ ।

झण्डै ३ अर्ब रुपैयाँको लागतमा बनेको यो जहाजको अर्को मुख्य विशेषता भनेको गोलीले प्वाल पारेको अवस्थामा समेत यो विमान उडान भर्न सक्छ ।

सुरुमा अमेरिकी सेनाको अनुरोधमा कम्पनीले यो जहाजको निर्माण सुरु गरेको थियो । तर आर्थिक कारणले अमेरिकी सेनाले सो जहाज खरीद गर्न असमर्थता जनाएपछि कम्पनीले यो जहाजको अधिकार फिर्ता लिएर आफ्नै स्वामित्वमा तयार गरेको हो ।

यो जहाजलाई उडान र अवतरणका लागि अन्य विमानलाई जस्तै लामो रनवे आवश्यक पर्दैन । यो हेलिकप्टरझैँ सिधै एकै ठाउँबाट उडान तथा अवतरण गर्न सक्छ । यो जहाज मरुभूमि, हिउँ तथा पानीको सतहमा समेत तैरिएर अवतरण गर्नसक्ने बताइएको छ ।

सन् २०१८ सम्म व्यवसायिक उडानका लागि १२ वटा यस्ता अन्य जहाज निर्माण गर्ने योजना कम्पनीको रहेको छ । यो विमानमा ४८ जना यात्रु अटाउँदछन् । यो विमान हवाइ जहाज, रकेट तथा हेलिकप्टरको ठिमाहा जस्तै छ ।