सम्राट सिंह
बझाङ । विकट हिमाली जिल्ला बझाङमा गर्भवती र सुत्केरी महिला र वालवालिकाको पोषण अवस्थामा सुधार गर्न सुआहारा कार्यक्रमले बितरण गरेका एक करोड साठी लाखका ४० हजार कुखुरा कार्यक्रम सम्पन्न हुनु पुर्व नै सकिएका छन ।

अमेरिकी सहयोग नियोगको आर्थिक सहयोगमा सामाजिक तथा प्राविधिक विकास सेवा समुह अन्र्तगत सुआहारा कार्यक्रमबाट जिल्लाका करिव ८ हजार घरधुरीलाइ यति ठुलो रकमको कुखुरा वितरण गरिएको थियो ।
आठ हप्ते चल्ला वितरण गर्ने भनिएता पनि चार देखी पाँच हप्ता सम्मका चल्ला वितरण गरिएका कारण पहिलो चरणमा वितरण गरिएका अधिकांस कुखुरा वितरण भएको केही दिन मै मरेको पाराकाट्ने ३ की नर्मा विष्टले वताइन ।

उता सुआहारा कार्यक्रमले आफुले दिएका कुखुरा मरे पछि अरु कार्यक्रमले दिएका कुखुरा देखाइ प्रगती देखाउने गरेको बुझिएको छ । दंगाजी गाविस वडा नं ५ की नारुदेवी नाथले पालेका कुखुराको सफलताको कथा बनाइ आफ्नो कार्यक्रमको प्रगती प्रतिवेदनमा समेत पेश गरेको जिल्ला पशुसेवा कार्यालयका एक प्राविधिकले बताए ।

नारुदेवीलाई कृषि तथा खाद्य सुरक्षा आयोजनाले कुखुरा वितरण गरेको थियो । नाम प्रकाशन नगर्ने शर्तमा उनले भने “सुआहारा मार्फत वितरण गरेका कुखुरा गाँउमा एउटा पनि छैन । सुआहाराको केन्द्रबाट आउने अनुगमन टोली लाई समेत कृषि तथा खाद्य सुरक्षा आयोजनाबाट हामीले बाडेका कुखुरा देखाउने गरेका छन ” कम उमेरका र रोगी कुखुरा वितरण गरेको कारण सुआहारा कार्यक्रमका कुखुरा धमाधम मरेको उनले बताए ।

सुआहारा कार्यक्रम मार्फत जिल्लाका ४२ गाविस र नगरपालिका गरी ३ वर्षको अवधीमा झण्डै ७ करोड भन्दा बढी रकम खर्च गरिएको भएता पनि खर्च अनुसारको उपलब्धी न्युन देखीएको सरोकारवालाहरु बताउँछन । कार्यक्रमले अधिकासं रकम चेतना विकासको लागी खर्च गरेको वताएता पनि ग्रामिण महिला तथा वालबालिकाको व्यवहारमा कुनै परिर्वर्तन नदेखिएको उनिहरुको गुनासो छ ।

संस्थाले काम भन्दा पनि कागज मिलाउनमै बढी जोड दिने गरेकोले उपलब्धी शुन्य भएको सुआहारा कै कर्मचारीहरुले आरोप लगाउने गरेका छन । प्रति कुखुरा ढुवानी सहित करिव ४ सयमा बझाङ पुगेको जनाइएको छ । यता सुआहारा जिल्ला संयोजक जगदिश लुहारले सबै गाँउका कुखुरा नसकिएको बताए । सबै काम तोके बमोजिम नै भएको छ र सुआहारा कार्यक्रमले जिल्लामा पोषणको क्षेत्रमा ठुलो योगदान पुर्याएको उनको भनाइ छ ।