सम्राट सिंह/ बझाङ  ।
हिमाली जिल्ला बझाङ सदरमुकाम चैनपुर यार्सा व्यापारले दिन प्रतिदिन बदलिदै गइरहेको छ । यार्सा व्यापार गरी विकट गाविस मा बसोबास गर्दै आएका बासिन्दाहरु महङगो जमिन खरिद गरी सदरमुकाममा झर्न थालेपछि चैनपुर बदलिदै गएको हो ।
ग्रामिण भेगका बासिन्दाले एक सिजनमा यार्सा संङकलन गरी प्रति परिवारले दश देखि पन्ध्र लाख सम्म आयआर्जन गर्ने गरेका छन । यार्सा व्यापार गरी प्रायजसो दौलिचौर, दाँतोला, कोटदेवल, काँडा, दहबगर, लेकगाउँ का बासिन्दाहरु सदरमुकाम झर्न थालेका हुन ।
यार्सा बिक्रि गरी सुर्मा,दौलिचौर गाविसका झण्डै एक सय पचास परिवारले सदरमुकाम चैनपुरमा जमिन खरिद गरी घर समेत बनाइ बसोबास गर्दै आएका दौलिचौर गाविसका ज्ञान बहादुर बोहोराले बताए । उनले भने यार्सा नै ग्रामिण भेगका बासिन्दाको आयआर्जनको मुख्य स्रोत बनेको छ ।
यार्सा व्यापार गरी प्रतिवर्गमिटर दश हजार देखि पचास हजार रुपिया सम्म जमिन खरिद गरी सदरमुकाम चैनपुरमा ठूला ठूला घर निर्माण गरेका छन । जिल्लामा यार्सा सङकलकहरु प्रत्येक बर्ष बैशाख देखि असार सम्म यार्सा संङकलन गर्न लेकतिर जाने गर्दछन । विगत दश बर्ष अगाडि बिस पच्चिस परिवारको बसोबास रहेको चैनपुरमा अहिले झण्डै सात सय परिवार बसोबास गरिरहेका छन ।
सदरमुकाममा शिक्षा,स्वास्थ्य,यातायात,संञ्चार जस्ता आधारभुत आवश्यकताहरु उपभोग गर्न विकट गाविसबाट बासिन्दाहरु सदरमुकाम केन्द्रित बनेका जयपृथ्वी नगरपालिका कार्यकारी प्रमुख सन्त बहादुर सुनारले बताए ।
सेती नदी र बाउली खोलाको बिच भागमा रहेको चैनपुर झट्ट हेर्दा टापु जस्तै देखिन्छ । अधिकांस सरकारी कार्यालय र व्यापार व्यवसाय गर्ने मानिसहरु चैनपुरमा भएकाले मानिसहरुको चहल पहल पनि चैनपुरमा नै हुन्छ । बझाङ सदरमुकाम चैनपुरमा हाल बाहिरी जिल्लाका व्यापारीहरुको बढी बाहुल्यता रहेको छ ।
तिन सिजनको यार्सा कमाइले सदरमुकाम चैनपुरमा जमिन खरिद गरी दुई तले घर निर्माण गरेको सुर्मा गाविस घर भएका टेक बहादुर बोहोराले बताए । उनले भने यार्साको कमाइले बर्षभरी खान,लगाउन पुगेको र २ वटा केटाकेटी पढाउन धनगढी पठाएको छु ।
यार्साले ग्रामिण भेगका बासिन्दाहरुको जिवनमा परिवर्तन ल्याएको छ । सिजनमा ८ बर्ष माथिका विद्यार्थीहरु पनि आफ्ना अभिभावक सँग यार्सा सङकलन गर्न लेकमा गएर विभिन्न संघर्ष गर्दै यार्सा संकलन गरेर तिन महिना पछि लेकबाट घर फर्कने गर्दछन । यार्सा संकलकहरुले चैनपुरमा ठूला ठूला घर निर्माण गरी सदरमुकाम चैनपुरको मुहार नै फेरीएको छ ।
फोटो क्याप्सन ः यार्सा संकलकले घर निर्माण गरेपछि बदलिएको बझाङ सदरमुकाम चैनपुर तस्बीर सम्राट सिंह