‘आलोक नेम्वाङ निर्देशित म्युजिक भिडियोमा अभिनय गर्ने प्रस्ताव आएको थियो,’ मोडल गंगा खतिवडाले नेपालमै रहँदाको अतीत सम्झिन्, ‘प्रस्ताव आएको केही समयपछि म कोरिया आएँ । कोरिया आएपछि हेयर सपका लागि फोटोसेसन गर्ने प्रस्ताव आयो । सहर्ष स्वीकारें । त्यसपछि काममै व्यस्त रहें । म्युजिक भिडियोमा अभिनयका लागि प्रस्ताव धेरै आए । तर, भ्याइनँ । हिजोआज समय अनुकूल पारेर एकाध म्युजिक भिडियोमा अभिनय गर्दै आएकी छु ।’

सन् २०१० मा कोरिया पुगेकी मोडल खतिवडाले २०१२ मा कोरियाली हेयर सपका लागि फोटोसेसन गर्ने अवसर पाएकी हुन् । फोटोसेसन गरेबापत एक लाख कोरियन वन पारिश्रमिक पाएको उनले बिर्सेकी छैनन् । हात लागेको पारिश्रमिक उनले कसरी सदुपयोग गरिन् ? उनले सुनाइन्, ‘सनग्लास किनेकी थिएँ ।’

हेयर सपका लागि फोटोसेसनपछि म पनि केही गर्न सक्छु भन्ने आत्मविश्वास बढेको उनले बताइन् । ‘यदाकदा म्युजिक भिडियोमा अभिनय गरे पनि प्रस्ताव भने बाक्लै आउने गरेको छ,’ उनले आफ्नो बाध्यता सुनाइन्, ‘कोरियामै त समय मिलाउन साइत जुराउनुपर्छ भने अभिनयका लागि कोरियाबाहिर जाने सम्भावना छैन । गायिका रेजिना रिमालको गीतको म्युजिक भिडियोमा अभिनय गर्न दुबई बोलाइएको थियो । तर, जान सकिनँ ।’

मोडल गंगा खतिवडाको लोकप्रियता हिमालसरी अग्लिँदै गएको छ । उनले विद्यालय बिदाका दिन गाउँ (ताप्लेजुङ, फुङलिङबजार) भरिका साथीभाइ बोलाएर नायिकाले गरेको अभिनयको नक्कल गरेर देखाउन खप्पीस थिइन् । उनले भनिन्, ‘अभिनय हेर्न आउने प्रत्येकबाट दुई रुपैयाँ संकलन गर्थें । संकलित रुपैयाँ साथीभाइ मिलेर चक्लेट, बिस्कुट खान्थ्यौं ।’

दस जोड दुईसम्मको अध्ययन पार लगाएकी र व्युटीपार्लरसम्बन्धी गहिरो ज्ञान भएकी उनले मोडलिङलाई व्यवसाय नबनाएर रहरमात्रै पूरा गरेको बताइन् । कोरियामा मोडलिङमा लागेरमात्रै जीविकोपार्जन गर्न सम्भव छैन । सुरु–सुरुमा म्युजिक भिडियोमा सित्तैमा अभिनय गरे पनि उनले हिजोआज एक म्युजिक भिडियोमा अभिनय गरेबापत ३ लाख कोरियन वन पारिश्रमिक तोकेकी छन् ।

पछिल्लो समय दक्षिण कोरियामा म्युजिक भिडियो छायांकन गर्नेक्रम बढेको छ । नेपालका गायक–गायिकासमेत कोरियाका रमणीय स्थलमा म्युजिक भिडियो छायांकन गर्ने लोभिने गरेका छन् । त्यतिमात्रै होइन, विभिन्न शीर्षकमा कोरिया पुगेकाले स्वदेश फर्कंदा ‘रेमिट्यान्स’ त भित्र्याउँछन् नै त्यसको अलावा विविध विधामा लोभलाग्दो परिचयसमेत बनाउने गरेका छन् । त्यसैमध्येकी एक हुन्– गंगा खतिवडा । कोरियामा छायांकन गरिने म्युजिक भिडियोका लागि खतिवडा सधैं रोजाइमा पर्ने गरेकी छन् ।

(हेर्नुहोस् कोरियाकी चर्चित मोडल गंगा खतिवडाको फोटो फिचर)