काठमाडौं । काठमाडौंको व्यस्त बजार चाबहिलमा डकैती गर्ने योजना बनाइरहेका ७ जनालाई महानगरीय प्रहरी परिसर काठमाडौंको टोलीले हतियारसहित पक्राउ गरेको छ । पर्वतको भोकसिङ गाविस ३ वस्ने प्रेमबहादुर कर्माको छोरा वर्ष २७ को पुष्कर लोहनी, सुनसरीको धरान नगरपालिका १५ संगम चोक बस्ने भेषबहादुर तामाङको छोरा वर्ष ३० को बर्मा तामाङ, धादिङको झार्लाङ्ग गाविस २ का विरबहादुर तामाङको छोरा वर्ष २७ को स्यामोल तामाङ, नुवाकोटको बेलकोट गाविस ३ बस्ने चन्द्रबहादुर दर्जीको छोरा वर्ष २५ को रामशरण नेपाली, सोही स्थानका श्यामबहादुर परियारको छोरा वर्ष २७ को रोशन परियार, काभ्रेपलाञ्चोक धुलिखेल नगरपालिका. १ वस्ने वर्ष २७ को रुषी भन्ने प्रेम तामाङ र धादिङको तिपलिङ गाविस ८ घर भएका पेम्वा घलेको छोरा वर्ष २७ को वेशिल घलेलाई महानगरीय प्रहरी परिसर काठमाडौंको टोलीले पक्रेको हो ।

उनीहरुको साथबाट एक थान पेस्तोल, त्यसमा लाग्ने गोली, मोबाइल सेट र ड्राइभिङ लाइसेन्स बरामद भएको छ ।

पक्राउ परेकाहरु सबै आपराधिक पृष्ठभूमिका भएको र उनीहरुमाथि थप अनुसन्धान भैरहेको काठमाडौं महानगरीय प्रहरी परिसरका प्रवक्ता विश्वराज पोख्रेलले जानकारी दिए ।