बलिउडमा सबैभन्दा ‘हट’ मानिएको जोडी रणवीर कपुर र क्याट्रिना कैफको ‘ब्रेकअप’ भएको समाचार छ । यो सम्बन्धविच्छेदका कारण ‘तमासा’ फिल्ममा रणवीरकी ‘को–स्टार’ रहेकी दीपिका पादुकोण भएको चर्चाले बलिउडमा भुसमा आगो फैलिएजस्तो रूप लिएको छ ।

नाइनएक्सइडटकमका अनुसार यी दुईबीच केही समययता बोलचालसमेत भएको छैन । अनलाइनले यी दुईले एक–अर्कासँग छुट्टिने निर्णय गरिसकेको दाबी गरेको छ ।

‘तमासा’ फिल्मको ‘प्रमोसन’ गर्ने समयमा यी दुईको खटपटलाई थप बल मिलेको बलिउडका साइटहरूले दाबी गरेका छन् । फिल्मको प्रचार–प्रसारमा दीपिका र रणवीरले रेल र गाडीमा लामो यात्रा सँगसँगै गरेको र यो कुरा क्याट्रिनालाई मन नपरेपछि यी दुईबीच खटपट सुरु भएको हल्ला चलेको छ ।

तर, अहिले दुवैजना लन्डनमा छन् । रणवीर फिल्म ‘ऐ दिल है मुस्किल’ र क्याट्रिना ‘फितुर’को ‘सुटिङ’का लागि लन्डन पुगेका हुन् । तर, त्यहाँ पनि यी दुईबीच भेट नभएको अनलाइनको दाबी छ ।

केही समयअघि यी दुईले ब्रान्द्रामा नयाँ फ्ल्याट लिएका थिए । अनुराग वसुको बहुप्रतिक्षित फिल्म ‘जग्गा जासुस’ पनि यी दुईले गर्ने सम्झौता गरिसकेका छन् । ब्रेकअप भएको खण्डमा यो फिल्म पूरा हुने–नहुने अन्योल बढ्नेछ ।