काठमाण्डौं । नेपाल हिन्दु युवा मञ्चले आयोजना गरेको नेपाल हिन्दु आमरण अनशनको आज सातौं दिन खुलामञ्चमा पत्रकार सम्मेलन सम्पन्न भयो । असंख्य पत्रकार, सञ्चारकर्मी, सन्त–महन्तहरू, संघ–संस्थाका प्रतिनिधिहरू र सर्वसाधारणको उपस्थितिमा हिन्दुराष्ट्रको उल्लेख संविधानमा गर्नैपर्ने कुरामा जोड दिइयो । कार्यक्रममा बोल्नुहुँदै नेपाली कंग्रेसका नेता कुमार रेग्मीले सनातन धर्मका बहुमूल्य संस्कृति र संस्कार मेटाउने खेललाई हामी सफल हुन दिंदैनौ भन्दै नेपाललाई सनातन हिन्दुराष्ट्र कायम गर्न चार युवाहरूले गरिरहेको यो अनशन एउटा बलियो खम्बा भएको कुरा जानकारी गराउनुभयो ।  अनशनमा बस्नुभएका खेमराज आचार्यले आफ्ना विचार व्यक्त गर्दै विश्वको एकमात्र सनातन हिन्दुराष्ट्र नेपाल नेपालको प्रमुख पहिचान हो र यही पहिचानलाई जोगाउनका लागि हामी अनशनमा बसेका छौं, भन्नुभयो । त्यसैगरी अर्का अनशनकारी प्रेमनिधि भारद्वाजले अनशन बस्दै गर्दा दुइटा अनुभूति भएको, एउटा नेपाल–आमाको छोरा हुन पाएकोमा गौरव लागेको र अर्काे आेंकार–परिवारका लागि समर्पित हुन पाउँदा आफू धन्य भएको महसूस गरेको बताउनुभयो । त्यसैगरी अर्का अनशनकारी सागर कट्वालले आफ्नो मन्तव्यमा, अब सारा नेपाली जाागेर मात्रै हिन्दुराष्ट्र ल्याउन सम्भव भएको भन्दै सम्पूर्ण नेपाली जनतालाई साथ र समर्थनका लागि आग्रह गर्नुभयो ।
कार्यक्रममा बोल्नुहुँदै जगद्गुरु मोहनशरण देवाचार्य–ज्यूले अब जनताका ताली मात्र हैन, हिन्दुराष्ट्र बचाउनका लागि अब संविधानसभा घेराउ गर्नुपर्ने जानकारी गराउनुभयो । त्यसैगरी अनशनकारीको स्वास्थ्यस्थितिको रिपोर्ट दिनुहुँदै प्रो. डा. रामप्रसाद उप्रेतीले अनशनकारीको ब्लडरिपोर्ट अनुसार वहाँहरूको स्वस्थ्य अवस्था गम्भीर र चिन्ताजनक रहेको जानकारी गराउनुभयो । साथै वहाँले अनशनकारीहरूले स्लाइन चढाउन नमानेको, बरु प्राण त्याग्छौं तर अहिले शरीरमा स्लाइन चढाउँदैनौ भनेको जानकारी गराउनुभयो ।