१६ असोज ०६० मा राती अन्दाजी १२ः१५ बजे बडिखेल–६ को खेलगाउँमा घरमा सुतिरहेको अवस्थामा फलामको धारिलो हतियारले घाँटी रेटेर भानु नगरकोटीसमेत पाँच सदस्यको सामुहिक हत्या भयो । नगरकोटीका नातामा जेठान चन्द्रबहादुर पहरीले उनको हत्या गरेर फरार भएका थिए । पहरीकी पत्नी भुन्टी भनिन सूर्यकुमारी र मृतकको पत्नी धनकुमारीबीच घटना हुनु भन्दा ६ दिन पहिला झगडा भएको थियो । पहरीले त्यतिखेर नै बहिनीज्वाइँलाई मार्ने धम्की दिएका थिए ।

उसो त पहरीले आफ्नी पत्नी र ज्वाइँ भानु सँगै बसेर मदिरा पिउने र अनैतिक सम्बन्ध राख्ने गरेको खबर भाञ्जाभाञ्जीबाट पाएपछि तनाव पाएका थिए । १६ असोज अर्थात् दशैँको अष्टमीका दिन पहरी आमाको घरमा राँगो काटेर मासु भाग लगाएपछि दुई भाग मासु बोकेर ज्वाइँको घरमा पुगेका थिए । नेवारी परम्पराअनुसार कुची भोज खाने चलन भएकाले आआफ्नो घरमा बसी भोज खाएका थिए । भोजसँगै रक्सी सेवन गरी पहरी आफ्नै परिवारसँगै सुतेको तर पुरानो झगडाको पीडा सहन नसकी बहिनीज्वाइँलाई सिध्याउँछु भनी राती १२ बजे पत्नी तथा घरपरिवारलाई थाहा नदिई खाली खुट्टामै कालो छिरमिरे सर्ट र कालो हाफ पाइन्ट लगाइ प्लाष्टिकको झोलामा एक जोर सर्ट पाइन्टसमेत बोकी बहिनीज्वाइँको घर पुगेका थिए ।

मूलढोका बन्द भएकाले शौचालयको छाना चढेर घरको भ¥याङमा उक्लिई पहरीले मासु काट्न प्रयोग गरिने दाउ बोकेर बहिनीज्वाइँ सुत्ने कोठामा पुगे । ढोका खुलै रहेकाले बहिनीज्वाइँ नै होला भनी दुवै हातले खाटमा सुतिरहेकालाई घाँटीमा दाउले मार हाने । झ्यालमा सिसा भएका कारण जुनको उज्यालोमा हेर्दा भान्जा रविन्द्र नगरकोटी र भान्जी लुरी रहेको उनले थाहा पाए । भान्जाभान्जी मारिसकेपछि दाउ बोकी तल्लो तलामा झरी दक्षिणतर्फको कोठामा जाँदा कोठामा बिजुली बत्ती बलिरहेको र खाटमा बहिनी धनकुमारी, ज्वाइँसँगै भान्जी टुकुली सुतिरहेको देखे ।

पहरीले पालैपालो बहिनी, ज्वाइँ र भान्जीलाई मार हाने । घटनापछि उनी राती ३ बजेसम्म बाँसको झ्याङमा लुके र बिहान ६ बजे मामाको श्राद्धका लागि पण्डित गोपाल ओझा बोलाउन उनको घर पुगे । भोलिपल्ट १०ः३० बजे पहरीका कान्छो छोरा महेश्वरले नगरकोटीको परिवारको हत्या भएको जानकारी गराउँदा उनले केही थाहा नपाएको अभिनय गरे । जेठो छोरा काले भनिने मुकेशले दिएको हैरानीका कारण तीनवर्षदेखि भक्तपुर चाँगुनारायण झौखेल बस्ने गरेका पहरीलाई बिहीबार पक्राउ गरिएको हो । उनलाई थप कारबाहीका लागि महानगरीय प्रहरी परिसर ललितपुर पठाइएको छ । ५२ वर्षको उमेरमा हत्यारा बनेका पहरी ६३ वर्षको उमेरमा तीन भान्जाभान्जीसहित बहिनीज्वाइँको हत्या आरोपमा पक्राउ परेको छन् ।