काठमाडौ, २४ साउन । अन्तराष्ट्रिय युवा दिवसका अवसरमा यस बर्ष चार जना पत्रकार सम्मनित तथा पुरस्कृत हुने भएका छन् । युवाका क्षेत्रमा काम गर्ने देशभरीका ५३ ओटा गैरसरकारी संघ संस्थाहरुको छाता संगठन नेपाल स्वतन्त्र युवा संघले आउदो २६ गते राजधानीमा सम्मान समारोहको आयोजना गरेर सम्मान गर्ने भएको हो । संघले आज जारी गरेको विज्ञप्तीमा कान्तीपुर दैनिकका समाचार सम्पादक हरिवहादुर थापालाई उत्कृष्ट युवा पत्रकारीता सम्मान २०७१ प्रदान गर्ने जनाइएको छ ।

त्यसैगरी युवा पत्रकार प्रतिभा सम्मान भने नेपालवाणी नेटवर्कका समाचार प्रमुख तथा राससका संवाददाता जीवन भण्डारी, सामुदायीक सुचना नेटवर्कका सम्पादक दिपक आचार्य र इमेज टेलिभिजनकी कोमल शेरचनलाई प्रदान गर्ने निर्णय भएको संघले जनाएको छ । संघका अध्यक्ष विशाल गैह्रेद्धारा जारी विज्ञप्तीमा उत्कृष्ट युवा प्रतिभा सम्मान २०७१ बाट गायक एवं बरिवेश व्यण्डका प्रमुख तिलकबम मल्ला र जलवायु परिवर्तन बारे खोज अनुसन्धान गर्ने युवा अनुसन्धानकर्मी फुर्वा लामालाई युवा प्रतिभा सम्मान गरिने उल्लेख छ । चार बर्ष अघि स्थापना भएको संघको २३ ओटा जिल्ला शाखा, ११ ओटा अञ्चलका ५३ ओटा युवा संस्थाहरु र ४३ सय युवाहरु सदस्य रहेको अध्यक्ष गैह्रेले जानकारी दिनुभएको छ ।