जनकपुर, ४ साउन । संविधानको मस्यौदाको सुझाव संकलस्थलमा प्रहरी र आन्दोलनकारीबीच झडप हुँदा जनकपुरमा दर्जनौं प्रदर्शनकारी घाइते भएका छन् । संविधानको प्राराम्भीक मस्यौदालाई जनतामाझ छलफल गराउन खोज्दा त्यसको विरोधमा उत्रेका मधेसवादी दल र प्रहरीबीच जनकपुरमा झडप भइरहेको छ । सोमबार जनकपुर उद्योग वाणिज्य संघको सभाकक्षमा सुझाव संकलनका लागि पुगेका सभासद्ह मिनाक्षी झा, प्रमिला दास र लिला कोइराला सभाकक्षमा प्रवेश गरेपनि सर्वसाधारणलाई प्रवेश निशेध गरिएको छ ।

नागरिकलाई प्रवेश नदिएपछि कस्तो छलफल हुने हो भन्ने प्रश्न गर्दै सभाकक्षमा प्रवेश गर्न खोजेका सर्वसाधारण र प्रहरीबीच अहिले झडप भइरहेको छ । त्यस्तैं संविधानको प्रारम्भिक मस्यौदामथि सुझाव संकलनका लागि महोत्तरीको जलेश्वरमा भएको कार्यक्रमलाई मधेस केन्द्रीत दलले अवरोध पुर्‍याएका छन्। क्षेत्र नम्बर ३ अन्तर्गत जलेश्वरस्थित जिल्ला विकास समितिको सभाहलमा हुन लागेको कार्यक्रममा उनीहरू आएर नाराबाजी र तोडफोडमा उत्रिएपछि कार्यक्रम अवरोध भएको हो। कार्यकर्ताले नाराबाजी गर्दै माइक र पोडियममा तोडफोड गरेका थिए। प्रहरीले बल प्रयोग गरेर बाहिर निकालेको थियो। जलेश्वरमा सुझाव संकलनको लागि सभासद रामदयाल मण्डलसहितको टोली आएको छ।