काठमाडौं, १४ जेठ  । अख्तियार दुरुपयोग अनुसन्धान आयोगले पूर्वाञ्चल विश्वविद्यालयका निलम्बित उपकुलपति, रजिष्टारसहित ६ जनालाई पक्रेको छ ।
भ्रष्टाचारको अभियोगमा निलम्बनमा परेका उपकुलपति डा महेश्वरमान श्रेष्ठ, रजिष्ट्रार डा निरोज पाण्डे, परीक्षा नियन्त्रक मोहनबहादुर बस्नेत, विज्ञान तथा प्रविधि संकायका सह–डिन राजेशकुमार झालाई अख्तियारले पक्रेको हो ।
त्यस्तै विज्ञान तथा प्रविधि संकालयका डिन शुभनारायण पाठक, व्यवस्थापन संकायका डिन श्यामबहादुर कटुवाललाई पनि पक्राउ गरेर हिरासतमा लिइएको अख्तियार प्रवक्ता श्रीधर सापकोटाले जानकारी दिनुभयो ।
पूर्वाञ्चल विश्वविद्यालयका पदाधिकारीबाट भ्रष्टाचार भएको उजुरी परेपछि गरेको अनुसन्धानमा ४ करोड २८ लाख ७० हजार रुपैयाँ हिनामिना भएको देखिएको आयोगले जनाएको छ । भ्रष्टाचारमा संलग्न ७ जनामध्ये कला, शिक्षा र कानुन संकालयका डिन शम्भुप्रसाद कोइराला भने फरार रहेको प्रवक्ता सापकोटाले जानकारी दिनुभयो ।
यसैबीच अख्तियार दुरुपयोग अनुसन्धान आयोगले जिविस बाराका तत्कालिन इन्जिनियर मेघुप्रसाद जयसवाल र उनकी श्रीमती निर्मला जायसवाल विरुद्ध भ्रष्टाचारको मुद्दा दायर गरेको छ ।
बारा जिविसमा कार्यरत रहँदा जयसवालले एक करोड ३० लाख ३४ हजार ८ सय ८७ रुपैयाँ ५५ पैसा गैरकानुनी रुपमा आर्जन गरेको पाइएपछि विशेष अदालतमा मुद्दा दायर गरिएको अख्तियारले जनाएको छ ।