गायक प्रलाद तिमल्सिना एक बहुप्रतिभाशाली गायक हुन् । बिजनेश हुदैं गायकक्षेत्रमा प्रवेश गरेका गायक प्रलाद निकै छोटो समयमा गायकक्षेत्रमा चम्केका व्यक्तिको रुपमा चिनिन्छन् । गाला रात्तै, बट स्लोली स्लोली लगायतका केहि चर्चित गीत गाएपछि उनको माग र चर्चा यति बेला नेपाली बजारमा व्यापक छ । पहिलो सोला एल्बम महक बजारमा ल्याएका उनी हाल महक २ नामक एल्बमको तयारीमा रहेको बताउँछन् । उनै चर्चित गायक प्रलाद तिमल्सिनासँग राष्ट्रिय खबरडटकमका सह—सम्पादक मनिष दाहालले गर्नुभएको कुराकानी :

१.अहिले के मा व्यस्त हुनुहुन्छ ?
अहिले नयाँ नयाँ गीतहरु र मेरो आफ्नै दोस्रो एल्बम महक २ बजारमा ल्याउने तयारी गरिरहेको छु ।

२.तपाईलाई सबैले बुझ्ने र सजिलै चिन्ने केहि चर्चित गीतहरु छन् ?
सबैलाई सबैले चिन्ने भनेको गाला रात्तै, बट स्लोली स्लोली लगायतका गीतहरु हुन् ।

३.तपाई बढि मात्रामा डासिङ गीतहरु गाउँनुहुन्छ, वियोगान्त गीतहरु गाउँन कठिन हुन्छ हो ?
त्यस्तो होइन । सुरुमा पनि मैंले वियोगान्त गीतहरु नै गाएको हुँ । मलाई संगीतकारहरुले जसरी दिनुहुन्छ मैले त्यहि अनुसार नै गाउँने हो । त्यसैले वियोगान्त गीत गाउँन गाह्रो हुन्छ जस्तो मलाई लाग्दैन ।

४.चलचित्र सफल भएपछि सोहि चलचित्रको सिक्वेल निर्माण गर्ने चलन जस्तै बनेको छ । तपाईले पनि पहिलो एल्बम महक राम्रो चलेपछि यसैको सिक्वेल भनेर महक २ ल्याउन खोज्नुभएको हो ?
सिक्वेल चाहि किन गरेको भन्दा नाम नयाँ जुराउँनुभन्दा पहिलाको नामबाट पनि अलि फलिफाप भएको र दोस्रो फेरी अर्को नयाँ नाम राख्दा अलि अफाप हुने होकी भनेर महकलाई नै महक २ नाम राखेर नयाँ एल्बम ल्याउन लागेको हुँ ।

५.यो एल्बममा कस्ता गीत छन् ?
एउटा डासिङ खाल्कै गीत छ भने अरु चाहि सेटिमेन्टल गीतहरु छन् ।

६.एउटा साधारण मानिसले जिउँने जिन्दगी र एउटा गायकले जिउँने जिन्दगी निकै फरक हुन्छ होइन ?
मलाई चाहि त्यस्तो लाग्दैंन । एउटा राजाले खाने पनि पेटभरी खाने हो र एउटा लेभरले खाने पनि पेटभरी हो तर खाइकीमा चाहि जुन हुन्छ त्यो चाहि फरक हुन्छ । नभएर त्यस्तो आकाश पतालकै फरक हुन्छ जस्तो चाहि मलाई लाग्दैन ।

७.एउटा गायक के कारणले बाँच्छ ?
नेपाली बजारमा हेर्ने हो भने स्टेजले नै बाँच्छ ।

८.तपाई चाहि स्टेज कार्यक्रममा कतिको देखिनु भएको छ ?
यो बर्ष देखी देखिएको छु । मेरो गायनक्षेत्र भन्दा पनि मेरो अर्को क्षेत्र बिजनेश पनि छ । त्यसैले पहिला मैले समय दिन सकिरहेको थिइन तर यस बर्षदेखी विभिन्न स्टेज कार्यक्रममा पनि देखिएको छु ।

९.एउटा गायकले गीत गाएर मात्रै बाँच्न सक्छ ?
अहिलेको अबस्थामा बाँच्न सक्ने अबस्था म देख्छु । एल्बम बेचेएर, टिभिमा देखिएर मात्र एउटा गायक बाँच्न सक्दैन तर स्टेज देखी अन्य कार्यक्रममा पनि सहभागी हुने हो भने अहिले नेपाली बजारमा गायक राम्रैसँग बाँच्न सक्छ ।

१०.पछिल्लो समय नेपाली गीत ,संगीतमा पनि धेरैं व्यक्तिहरु भित्रिरहेका छन् । एउटा नयाँ गायक संगीतक्षेत्रमा भित्रियो भने पुरानो गायक विस्तापित हुने कत्तिको सम्भाबना छ ?
म चाहि त्यस्तो देख्दिन । आफु भित्र कस्तो कला र दर्शक स्रोताले कस्तो रुचाउनुहुन्छ त्यसैमा भर पर्छ ।

११.अब पारिवारिक कुरा गरौं । कहाँबाट आउँनु भयो काठमाडौं ?
हाम्रो पुर्खाहरु चाहि काभ्रेबाट आउनुभएको हो । म जन्मेको चाहि हेटौंडा मकवानपुर जिल्लामा हो । म हेटौडा हुदै काठमाडौ छिरेको हुँ ।

१२.गीत संगीतको रुची चाहि कसरी भयो ?
म सानै देखी गीत संगीतको निकै ठुलो पारखी हुँ । सानै देखी म स्कुलमा आयोजना हुने विभिन्न कार्यक्रममा गाउँने गर्थे । र केहि पटक गाएर नै पहिलो समेत भएको छु । त्यसैले यो क्षेत्रमा मेरो सानै देखीको रुची हो ।

१३. तपाई बिजनेश गर्ने व्यक्ति पनि अनि गीत संगीतमा लाग्नु भएको छ । कतिको गाह्रो हुन्छ समय निकाल्न ?
गाह्रो भएर नै हो मैले केहि समयदेखी गीत संगीतलाई समय दिन सकिरहेको थिइन । तर अहिले केहि सजिलो छ त्यसैले अहिले गीत संगीतलाई पनि समय छुट्याउदै गएको छु ।

१४. के देख्नु भयो यो क्षेत्रमा ?
यो आफु भित्रको एउटा इच्छा पनि हो । यो काम आफ्नो कला र गलाबाट गर्न पाइन्छ भने किन नगर्नु भनेर यो क्षेत्रमा लागेको हुँ । र यो क्षेत्रबाट एउटा पहिचान दिने अलग घार पनि हुन्छ ।

१५.एउटा गायक हुनका लागि चाहिने खुबी चाहि के हो ?
सुरुमा चाहि गीत बुझ्नु पर्छ, मिठासपना हुनु पर्यो, गीत सुन्दा अरुलाई आनन्द आउनु पर्यो ।

१६.पछिल्लो समय पैसाको दमले पनि यो क्षेत्रमा नयाँ गायक, गायिकाहरु भित्रिरहेका छन् हैन ?
अहिलेको जमनामा पैसा नभए केहि पनि हुदैन । र यो क्षेत्रमा लाग्नका लागि पैसा पनि आवश्यक छ ।

१७.विदेशिने सोच बनाउँनु भएको छ की छैंन ?
मेरो बिजनेश यहि भएका कारणले गर्दा त्यस्तो सोच भने बनाएको छैंन ।

१८.यो क्षेत्रलाई व्यबस्थित बनाउन के गर्नुपर्छ जस्तो लाग्छ तपाईलाई ?
पाइरेसी सबै भन्दा ठुलो बिडम्बना हो अहिले । सरकारले यो विषयमा कडा निती ल्याएर अगाडी बनाउन सके व्यबस्थित हुन्थ्यो कि जस्तो मलाई लाग्छ ।