नारायण रिजाल
बागलुङ,१३ असार । बागलुङको हिलमा शुक्रबार राती सडक माथिबाट खसेको ढुंगाले लागेर मोटरसाईकलमा सवार एक युवाको मृत्यु भएको छ । हिल घुस्मेली बजारमा व्यापार व्यवसाय गर्दै आएको ३७ वर्षिय श्याम चोखाल (राजु) को मृत्यु भएको जिल्ला प्रहरी कार्यालय बागलुङले जनाएको छ । हिलमा निर्माणाधीन सयपत्री हाईड्रोपावरको क्यान्टिन नजिक उत्तरपट्टीको घुम्टीमा सो दुर्घटना भएको हो । गल्कोट हुँदै ताराखोला तर्फ जाँदै गरेको ध १ त ४४९० नम्वरको मोटर साईकलमा सवार चोखाललाई माथिबाट खसेको ढुङाले लागेको थियो । दुर्घटनामा चोखालको शिरमा चोट लागेको थियो । दुर्घटनामा गम्भीर घाईते चोखालको गल्कोट प्राथमिक स्वास्थ्य केन्द्रमा उपचारको क्रममा मृत्यु भएको प्रहरीले जनाएको छ । मोटरसाइकलमा सवार अर्का प्रमोद चौधरी सकुशल रहेका छन ।