काठमाडौं,९ असार । धनगढी नगरपालिका–५ को जाँई चोकमा मङ्गलबार दिउँसो गोली प्रहार गरेर फरार भएका व्यक्ति पक्राउ परेका छन्। जिल्ला प्रहरी कार्यालयका अनुसार गोली प्रहारपछि फरार रहेका दिनेश बोहरालाई घटनास्थलदेखि झन्डै चार किलोमिटरको दूरीमा रहेको अत्तरिया नगरपालिका–६ बेला गाउँस्थित आफन्तको घरबाट मङ्गलबार राति पक्राउ गरिएको हो। मङ्गलबार मध्याह्न युके०६आर २६३३ नम्बरको मोटरसाइकलको पछाडि सवार दिनेशले मोटरसाइकल चलाइरहेका आफ्नै दाजु कुमार बोहरामाथि गोली प्रहार गरी फरार भएका थिए।
गोली लागेर कुमार सडकमै ढलेपछि सोही मोटरसाइकल र अन्य कागजात लिएर दिनेश फरार भएका थिए । घटनालगत्तै प्रहरीले सुरु गरेको खोजी क्रममा आफन्तको घरमा उनी फेला परेका थिए। बोहराको नाममा कैलालीमा रहेको अचल सम्पत्तिको अंशबन्डासम्बन्धी विवादसँगै दिनेशले कुमारमाथि गोली प्रहार गरेको प्रारम्भिक अनुसन्धानले देखाएको प्रहरी निरीक्षक सूर्यबहादुर चन्दले बताए। रासस