प्रधानमन्त्री कप महिला राष्ट्रिय क्रिकेट प्रतियोगितामा मंगलबार सेमिफाइनलका खेल हुँदैछन् । पोखरा रंगशालामा हुने पहिलो सेमिफाइनलमा सशस्त्र प्रहरी वलको एपीएफ र क्षेत्र नम्बर ९ धनगढी आमने सामने हुनेछन् । एपीएफ समूह ‘ए’ को बिजेता हो भने धनगढी समूह ‘बि’ को उपबिजेता हो । त्यस्तै, दोस्रो सेमिफाइनल खेलमा क्षेत्र नम्बर ७ जनकपुर र क्षेत्र नम्बर १ विराटनगर प्रतिष्पर्धामा उत्रिदैछन् । जनकपुर समूह ‘बि’ को बिजेता बन्दै सेमिफाइनलमा प्रवेश गरेको हो भने विराटनगर समूह ‘ए’ को उपबिजेता बन्दै सेमिफाइनलमा आइपुगेको हो । प्रतियोगितामा प्रथम हुनेलाई नगद ५० हजार, दोस्रो हुनेलाई ३० हजार र तेस्रो हुनेलाई २० हजार सहित शिल्ड, मेडल र प्रमाणपत्र प्रदान गरिनेछ । जारी प्रतियोगिताबाटै महिला राष्ट्रिय टिमका लागि खेलाडी छनौट गरिने आयोजकले जनाएको छ ।