पहिलो चलचित्र ‘होस्टल’ र दोस्रो चलचित्र जेरीबाट सफलता पाएपछि पुन आफ्नो नयाँ चलचित्र ‘ड्रिम्स’ को छायांकनमा व्यस्त रहेका चकलेटी नायक अनमोल केसी हाल नयाँ हिरोइन सामराज्यलक्ष्मी शाहसँग रोमान्स गरिरहेका छन् । पोखराको फुलबारी रिसोर्टका मालिका बनेर चलचित्रमा देखिन लागेका अनमोलले नयाँ नायिका सामराज्यलक्ष्मी शाहसँग हाल चलचित्रमा समावेश एक गीतको छायांकन सकाएका छन् । उक्त गीतमा कविराज गहतराजले कोरियोग्राफी गरेका छन् । अभिनेता भुवन केसीको लगानी र निर्देशनमा तयार भइरहेको चलचित्र ‘ड्रिम्स’ बाट पहिलो पटक चलचित्रक्षेत्रमा डेव्यू गरेकी सामराज्यलक्ष्मी शाह अनमोलका लागी उत्कृष्ट रहेको भुवनले बताएका छन् ।

नेपाली चलचित्रक्षेत्रका लागी सामराज्यलक्ष्मी शाह नयाँ अनुहार हुन । उनले केहि म्युजिक भिडियोमा अभिनय गरेपनि हालसम्म चलचित्रमा अभिनय गरेकी छैनन् । प्रेमकथामा आधारित भएर निर्माण हुन लागेको चलचित्र ‘ड्रिम्स’ को छायांकन करिब ५० प्रतिशत सकिएको अभिनेता केसीले जानकारी दिए । मुस्ताङमा छायांकन गरिरहँदा भूकम्प आएपछि १५ प्रतिशत छायांकन सकाएर काठमाडौं आएको चलचित्र ‘ड्रिम्स’ को टोली करिब १ महिनाको विश्रामपछि फ्लोरमा गएको हो ।