काठमाडौं, १७ जेठ । विद्यालयका नाममा आएको जस्तापाता बिक्री गर्न लागेको भन्ने आरोपको खण्डन गर्न अर्थमन्त्री डा.रामशरण महतका पीए रमेश महतले आयोजना गरेको पत्रकार सम्मेलनमा प्रश्नकर्ता कुटिएका छन् । रिपोटर्स क्लब नेपालमा आइतबार आयोजित पत्रकार सम्मेलनमा रमेश महतलाई प्रश्न सोध्ने नुवाकोट कविलासका कृष्ण बोहोरामाथि काँग्रेस कार्यकर्ताले हातपात गरेका हुन् ।एमाओवादी कविलास गाउँ पार्टी अध्यक्षसमेत रहेका बोहोरालाई प्रश्न गरेकै निउँमा काँग्रेस कार्यकर्ताले थप्पड हानेपछि पत्रकार सम्मेलन नै रोकिएको छ ।

पत्रकार सम्मेलन भृकुटीमण्डपस्थित रिपोटर्स क्लबको अस्थायी कार्यालयमा आयोजना गरिएको थियो । पत्रकार सम्मेलनमा क्लबका अध्यक्ष ऋषि धमलासमेत उपस्थित थिए । तनाबपछि अहिले रिपोटर्स क्लबमा प्रहरी पुगेको छ । नेपाल इन्भेस्टमेन्ट बैंकले नुवाकोटको कविलास गाउँ विकास समितिका विद्यालयहरुका लागि उपलब्ध गराएको जस्तापाता अर्थमन्त्रीका पीए रमेश महतले बिक्री गर्न लागेको भन्दै स्थानीयले नियन्त्रणमा लिएर राखेका छन् ।

३० सय बण्डल जस्तामध्ये ३० बण्डल महतकै घरमा झारेर बाँकी २ सय ७० पाता काठमाडौं ल्याइँदै थियो । सो जस्तापाता सहितको गाडी अहिले पनि नुवाकोटको छहरेमा स्थानीयको नियन्त्रण र प्रहरीको निगरानीमा छ ।