सिन्धुली, १५ जेठ । पूर्व प्रधानमन्त्री तथा नेपाली कांग्रेसका वरिष्ठ नेता शेरबहादुृर देउवाले भूकम्पबाट सिर्जना भएको विपत्तीको सामना गर्न राष्ट्रिय सहमतिको सरकारको आवश्यक रहेको बताउनु भएको छ । भूकम्प प्रभावित क्षेत्रको अनुगमनका क्रममा सिन्धुली पुग्नुभएका नेता देउवाले यस्तो बताउनुभएको हो । राष्ट्रिय सहमतिको सरकारको नेतृत्व तपाईं आफैले गर्ने हो ? भन्ने पत्रकारको जिज्ञासामा उहाँले भन्नुभयो, ‘सुशील कोइरालालाई त पत्याएनन्, मलाई के पत्याउलान् ?’

उहाँले भूकम्पका कारण संविधान निर्माण प्रकृया नरोकिने बताउनुभो । ‘संविधान निर्माण प्रकृया रोकिएको छैन, एक-दुई महिना ढिलो भने हुन सक्छ,’ देउवाले भन्नुभयो । सिन्धुली जिल्लाका सबै ठाँउमा ढिलै भएपनि राहत पुगेको पाएको र भूकम्प पीडितका लागि अब टहरा मात्र बनाउन आवश्यक रहेको बताउनुभयो ।
नेता देउवाले भन्नुभयो, ‘राष्ट्रिय नीति आएपछि मात्रै बलियो घर बनाउने हो । अब बन्ने घर यो भन्दा ठूलो भूकम्प आउँदा पनि नभत्किने हुनुपर्छ ।’ भूकम्पले पार्टीको अधिवेशन नरोकिने पनि उहाँले बताउनुभयो । ‘अधिवेशन गर्न गाँउमा एक दिन लाग्ने हो, जिल्लामा एक दिन लाग्ने हो,’ उहाँले भन्नुभयो, ‘तोकिएकै मितिमा अधिवेशन हुन्छ, एक दिन पनि सर्दैन ।’