काठमाडौं,१२ जेठ । शक्तिशाली भूकम्प गएको महिना दिन पुगेको दिन मंगलबार एउटा मात्रै पराकम्पन गएको छ । मंगलबार दिउँसो २ बजेर ११ मिनेट जाँदा दोलखा केन्द्रविन्दु भएर ४.३ म्याग्नेच्युडको भूकम्प गएको राष्ट्रिय भूकम्प मापन केन्द्रले जनाएको छ । बैशाख १२ गते गोरखाको बारपाक केन्द्र विन्दु भएर ७.६ म्याग्नेच्युडको भूकम्प गएपछि आजपर्यन्त यसका पराकम्पन जाने क्रम जारी छ । यसअघि सोमबार पनि ३ वटा भूकम्पको पराकम्पन गएको थियो । शक्तिशाली भूकम्प गएपछि पराकम्पन गइरहने भएकाले नआत्तिन तर सचेत रहन भने विज्ञहरुले सुझाव दिएका छन् । एक महिनाको अवधिमा आएका भूकम्पका परकम्पहरुले समेत जनधनको ठूलो नोक्सानी गरेका छन् ।

मध्य क्षेत्रमा सबैभन्दा धेरै मानविय क्षती भएको छ । यूनेस्कोको सम्पदा सूचीमा रहेका धेरै ठाउँमा ठूलो क्षती भएको छ । काठमाडौंमा रहेको ९ तले धरहरा तीन टुक्रा भएको छ । त्यो एक तलामा सिमित भएको छ । यसैगरी बसन्तपुर दरबार स्क्वायर, पाटन दरबार स्क्वायर, भक्तपुर दरबार स्क्वायरमा धेरै क्षति भएको छ । योसँगै ४ लाख ७० हजार ९ सय ९१ भौतिक संरचनाहरुमा कमा नलाग्ने गरि भत्केका छन् । अहिलेसम्म १२ गतेको भूकम्प र त्यसपछिका पराकम्पनका कारण ८ हजार ६ सय ६३ जनाको ज्यान गैसकेको छ भने ३ सयजति मानिस भुईचालोपछि बेपत्ता छन् । बेपत्ता हुनेमा नेपाली १ सय ९८ र विदेशी नागरिक ८० जना छन् । २१ हजार ९ सय ५४ जना घाइते भएका छन् । १८ जनाको शव पहिचान हुन नसकेको प्रहरीले जनाएको छ । प्रहरीका अनुसार १४ पुरुष, एक विदेशी सहित ३ महिला, एक बालिकाको शव पहिचान नभएको हो । उनीहरुको शवलाई त्रिवि शिक्षण अस्पतालमा राखिएकोे छ । १२ गतेको भूकम्पपछि अहिलेसम्म ५ रेक्टर स्केल माथि र ६ रेक्टर स्केल मुनिका ३५ वटा परकम्प गैसकेको राष्ट्रिय भूकम्प मापन केन्द्रले जनाएको छ । ६ देखि ७ का ५ वटा ठला भुकम्प गएका छन् । यसैगरी ४ देखि ५ का २ सय ५८ पुगेका छन् । ४ भन्दा मुनिका १० औ हजार पुगेका छन् ।