नवलपरासी, १२ जेठ । नवलपरासीको रामनगर–२ वडेरामा भएको दुर्घटनामा एकजनाको ज्यान गएको छ । ५ जना घाइते भएका छन् । पूर्वपश्चिम राजमार्ग अन्तर्गत रामनगर–२ वडेरामा सोमबार राती ट्रक र मिनी ट्रक एक आपसमा ठोक्किँदा दुर्घटना भएको प्रहरीले जनाएको छ ।

ना ४ख ७५५९ नम्बरको ट्रक र बा १ क ३५३१ नम्बरको मिनी ट्रक एकआपसमा ठक्कर खाँदा कपिलवस्तु भलवार घर भई नवलपरासीको सुनवल–४ बस्ने २० बर्षका आशिष थापाको ज्यान गएको जिल्ला प्रहरी कार्यालय नवलपरासीले जनाएको छ । दुर्घटनामा दुवै ट्रकका चालक पनि घाइते भएका छन् । घाइतेमध्ये दुई जनाको चितवनको भरतपुर र तीनजनाको वुटवलमा उपचार भइरहेको छ ।
यस्तै नवलपरासीकै देवागाउँ गाविस वर्डा नं। ६ मा दुई वटा मोटरसाइकल एक आपसमा ठोक्किँदा एक जनाको ज्यान गएको छ । लु १९ प २२७४ र लु ३ प ४४७१ नम्बरको मोटरसाइकल एक आपसमा ठोक्किँदा लु १९ प २२७४ नम्बरको मोटरसाइकल चालक भारत महाराजगंजका २५ बर्षका मनोज चौधरीको ज्यान गएको प्रहरीले जनाएको छ ।