जनकपुर,८ बैशाख । भानुचौकस्थित ग्लोवल आईएमबी बैंकबाट रकम लुटेर भाग्दै गरेको लुटेरालाई तत्कालै प्रहरीले पक्राउ गरेको छ । सोमबार बैंकबाट रकम झिकेर मिलाउँदै गरेका बेला भारत जयनगरका व्यापारी सचिन सिंगान्चीको ९ लाख ३५ हजार लुटिएको थियो । अपरान्ह ३ बजे भएको उक्त घटनाबारे पीडित सिंगान्चीले होहल्ला गरेपछि भानुचौकमा डियुटीमा बसेका प्रहरी जवान रामनारायण राउतले एक्लै लखेटेर लुटेरलाई पक्रिन सफल भए ।
भारत पटनाका १५ वर्षीय रितेश कुमार दास रकमको ब्याग सहित पक्राउ परेका छन् । भानुचौकबाट झन्डै ५ सय मिटरको दुरीमा रहेको जनक चोकबाट लुटेर पक्राउ परेका हुन् । प्रहरी निरीक्षक भागिरथ रेग्मीले लुटिएको रकम जिल्ला प्रहरी कार्यालयमा रहेको र थप अनुसन्धानपछि सम्बन्धित व्यक्तिलाई फिर्ता गरिने बताए ।