प्रविण टिबडेवाल
रौतहट २३ चैत्र । रौतहट जिल्लाको सदरमुकाम गौर स्थित वडा नं ५ पोखरीया टोलमा एक वृद्धको घाटी रेटी हत्या भएको छ । स्थानिय अन्दाजी ६० बर्षिया  वृद्ध जाहिर अन्सारीको घाटी रेटी हत्या गरिएको अवस्थामा सोमवार विहान मृत फेला परेको स्थानियले बताएका छन् ।
आफ्नो घरमा सुतेको अवस्थामा हत्या गरिएका अंसारीको शव पोष्टमार्टमका लागि गौर अस्पतालमा राखिएको छ । मृतक अंसारीका छोरा वैदेशिक रोजगारीका क्रममा बाहिर रहेको कुरा परिवारजनले जनाएको छ । छोराले घर बनाउन ठूलो रकम पठाएको हुनाले सोही रकम लुटने क्रममा उनको हत्या भएको हुन सक्ने आशंका गरिएको छ ।
हत्याराले  अन्सारीको घरबाट पाच लाख नगद समेत लुटपाट गरेका छन् । बाहिर कर्फयू लागेको छ भन्दै आइतबार राती बास बस्न आएका एक व्यक्तिले सुतिरहेका अन्सारीलाई घाटी रेटेर हत्या गरेका थिए । अन्सारीले आईतवार मात्रै घर मर्मतका लागि बैंक बाट पाच लाख रुपैया निकालेको कुरा परिवारीक श्रोतले जनाएको छ ।
अंसारीको हत्या र लुटपछि प्रहरीले अनुसंधान तिब्र पारेको छ । अंसारीको हत्या पछि गौर आन्दोलन थप हिंसात्मक हुने खतरा बढेको छ ।
यता प्रहरीको प्रारम्भिक अनुसंधानबाट अंसारीको हत्या गौर १० सबगढा निवासी परवेज अंसारीले गरी फरार रहेको कुरा खुल्न आएको डिएसपी सुधिर राज शाहिले बताएका छन् ।