विराटनगर,१९ चैत । राष्ट्रिय प्रजातन्त्र पार्टी नेपालका अध्यक्ष कमल थापाले ‘एमाओवादी नेतृत्वको ३० दलीय मोर्चा संविधानसभा भंग गराउने सुनियोजित खेलमा लागेको’ आरोप लगाएका छन् । विराटनगरमा बुधबार आयोजित आमसभालाई सम्बोधन गर्दै थापाले ‘एमाओवादी र मधेसी दलहरुको आन्दोलन संविधानसभा समाप्त पार्ने षड्यन्त्र’ भएको बताए । ३० दलीय मोर्चाको उद्देश्य संविधानसभा भंग गराउने र देशलाई थप अस्थिरतातर्फ धकेल्ने भएको उनको जिकिर थियो । त्यस्तैं उक्त कार्यक्रममा बोल्दैं कमल थापाले कांग्रेस र एमालेका कारण लोकतन्त्र खतरामा परेको उनले बताए ।

उनले एमाओवादी, मधेसवादी मोर्चाले संविधानसभाको प्रक्रिया छाडेपछि सत्ता पक्षलाई सघाउँदै विधि र प्रक्रिया मानेको आफ्नो पार्टीमाथि कांग्रेस र एमालेले निषेधको राजनीति गरेको आरोप लगाए । ‘अहिलेको समय सबैलाई समेटेर संविधान निर्माण गर्ने हो, तर कांग्रेस-एमाले आफ्नो एजेन्डामात्रै लगेर अरूलाई निषेध गर्दै छन्,उनले भने । विवादित विषयहरु संविधानसभाबाटै टुङ्ग्याउनुपर्ने कुरामा जोड दिँदै अध्यक्ष थापाले सहमतिका नाममा सत्ताको मोलमोलाई भइरहेको उल्लेख गरे। उनलेले संविधानसभाका अध्यक्ष सुवास नेम्बाङलाई संविधान सभाको पूर्ण बैठक तत्काल बोलाउन आग्रह गरे।