काठमाडौं,११ चैत । सर्वोच्च अदालतका तत्कालीन न्यायाधीश रणबहादुर बममाथि गोली प्रहार गर्ने मुख्य योजनाकार सञ्जय स्माईली मगरलाई प्रहरीले साउदी अरबाट पक्राउ गरेको छ। इन्टरपोलमार्फत जारी गरेको डिफ्युजन नोटिशका आधारमा मगरलाई साउदी प्रहरीले मंगलबार पक्राउ गरेको केन्द्रीय अनुसन्धान ब्यूरो (सिआईबी) का प्रमुख डिआईजी हेमन्त मल्ल ठकुरीले बताए । पक्राउ परेका मगरलाई बुधबार नेपाल ल्याउने तयारी गरिएको छ । पहिलो संविधानसभा निर्वाचनमा चुरेभाबर पार्टीका उमेद्वारसमेत रहेका घटनाका मुख्य सुटर भगवान भनिने सञ्जय स्माइली मगर विदेशमा भएकाले प्रहरीले उनीविरुद्द इन्टरपोलमार्फत डिफ्युजन नोटिश जारी गरेको थियो । २०६९ जेठ १८ गते बगलामुखी मन्‍दिरको दर्शन गरेर फर्किने क्रममा ललितपुरको युएन पार्क नजिकै न्यायाधीश बमको गोली हानी हत्या गरिएको थियो।