सिरहा, १० चैत । सिरहाको मिर्चैया नगरपालिका ८ बाट प्रहरीले प्रतिबन्धित लागु औषधसहित एक युवकलाई पक्राउ गरेको छ । पक्राउ पर्नेमा मिर्चैया नगरपालिका ६ का करिब २३ वर्षका लक्ष्मी यादव रहेको इलाका प्रहरी कार्यालय मिर्चैयाका प्रहरी निरीक्षक हरि खतिवडाले जानकारी दिनुभयो ।

नियमित गस्तीमा रहेको प्रहरी टोलीले मिर्चैया नगरपालिका ८ स्थित बजारमा शंकास्पद अवस्थामा हिंडिरहेको अवस्थामा यादवको शरीर खानतलासी गर्दा पाँच बोतल कोरेक्स, १० थान नाइट्रोसन बरामद गरिएको प्रहरी निरीक्षक खतिवडाले उल्लेख गर्नुभयो । पक्राउ गरिएका यादवलाई लागूऔषध कारोबार ओसारपोसार सम्बन्धी मुद्दा चलाइने प्रहरी निरीक्षक खतिवडाले उल्लेख गर्नुभयो । पछिल्लो पल्ट मिर्चैयामै प्रहरीले लागूऔषधसहित सरकारी स्वास्थ्य संस्थामा कार्यरत स्वास्थ्यकर्मीलाई पक्राउ गरेको थियो ।