सिन्धुली, २२ वैशाख ।  सिन्धुलीको कर्करेमा आइतबार राती बस दुर्घटना हुँदा ६ जनाको ज्यान गएको छ । दुर्घटनामा ३२ जना घाइते भएका छन् ।
काठमाडौबाट सिन्धुलीको लागि छुटेको बा २ ख ६६ ०६ नम्बरको बस कमलामाई नगरपालिका कर्करेमा सडकबाट खस्दा घटनास्थलमै ६ जनाको ज्यान गएको प्रहरीले जनाएको छ ।
दुर्घटनामा सिन्धुली आमबोटेका उद्धव पुलामी मगर, चित्रबहादुर पुलामी, सिन्धुली लामभण्डारका सुकुमाया तामाङ र मकवानपुर हेटौडाका रामेश्वर अधिकारीको ज्यान गएको प्रहरीले जनाएको छ । ज्यान गुमाउने अरु दुई जनाको परिचय खुल्न सकेको छैन ।
दुर्घटनामा घाइतेमध्ये ११ जनालाई उपचारका लागि काठमाडौ पठाइएको छ भने १० जनाको सिन्धुली जिल्ला अस्पताल, ८ जनाको धनुषाको लालगढ र ४ जनाको महोत्तरीको बर्दिवासमा उपचार भइरहेको जिल्ला प्रहरी प्रमुख नरेन्द्र उप्रेतीले जानकारी दिनुभयो ।