काठमाडौं,९ चैत । राजधानीको थापागाउँमा सोमबार बिहानै हत्या गरेर फालिएको अवस्थामा नेपाली सेनाका अवकाशप्राप्त सुबेदारको शव फेला परेको छ । सिंहदरबार छेऊको हनुमानथानबाट थापागाउँतर्फ जाने विजुलीबजार पुलकै छेऊमा सोमबार बिहानै शव फेला परेको हो ।

मृतक दाङ घर भएका नेपाली सेनाका अवकाशप्राप्त सुबेदार द्रोणबहादुर सेन रहेको प्रहरीले बताएको छ । बानेश्वर पञ्चकुमारी मन्दिर छेउमा हरी थापामगरको घरमा डेरा गरी बस्ने सेनलाई राति कसैले मारेर फालेको भेटेपछि सोमबार बिहान स्थानीयले प्रहरीलाई खबर गरेका थिए । मृतक सेनको टाउकोमा चोट लागेको देखिएको छ। घटनाको बारेमा अनुसन्धान भइरहेको प्रहरीले जनाएको छ। मृतक सेनका श्रीमती एक छोरा र दुई छोरी छन्। नेपाली सेनाबाट अवकाश पाएका सेनकी श्रीमती काठमाडौको हेम्स हस्पिटलमा कार्यरत छिन्।