काठमाडौं,८ चैत । आफ्ना दुई पोलिटब्यूरो सदस्य सहित १७ जना कार्यकर्तालाई गिरफ्तार गरेपछि आक्रोशित बनेको नेत्रविक्रम चन्द (विप्लव) नेतृत्वको नेकपा माओवादीले संघर्षका नयाँ कार्यक्रम घोषणा गरेको छ । राजधानीमा पत्रकार सम्मेलन गरी घोषणा गरिएको आन्दोलनका कार्यक्रम अनुसार चैत ९ गते कोण सभा र चोक सभा चैत १० गते माइकिंग र चोक सभा ११,१२,१३ र १४ गते प्रचार प्रसार १५ गते जीएमआर कार्यालय घेराउ १६ गते देशका सबै जिल्ला कार्यालय घेराउ १७ गते मशाल जुलुस र १८ गते नेपाल बन्दको आयोजना गरेको छ । त्यस्तै १६ गते देशका सबै जिल्ला कार्यालय घेराउ, १७ गते मशाल जुलुस र १८ गते नेपाल बन्द गर्ने स्थायी समिति सदस्य धर्मेन् बास्तोलाले जानकारी दिए ।

बास्तोलाले अबका दिनका संघर्षमा राधेश पन्तको घरमा मात्र नभई प्रधानमन्त्रीको घरमा समेत कालोझण्डा गाढ्ने चेतावनी दिए । अपर कर्णाली, माथिल्लो मस्र्याङ्दी र अरुण तेस्रो जलविद्युत आयोजनामा राष्ट्रघाती सम्झौताहरु गरिएको र त्यो सम्झौतामा नेपालका तर्फबाट हस्ताक्षर गरेको भन्दै माओवादीले शुक्रबार नेपाल लगानी वोर्डका कार्यकारी निर्देशक राधेश पन्तको घरमा कालोझण्डा राख्नुका साथै र विरोध प्रदर्शन गरेको थियो ।

सोही कार्यक्रमबाट प्रहरीले पूर्व मन्त्री पोलिटब्यूरो सदस्य समेत रहेका पदम राई र अर्का पोलिटब्यूरो सदस्य ईश्वरी दाहाल (असारे काका)लाई गिरफ्तार गरेको थियो । उनीहरुसहित प्रहरीले १७ जना कार्यकर्ताहरु गिरप्तार गरी जिल्ला प्रहरी कार्यालय हनुमानढोकामा राखेको छ । माओवादीले शुक्रबार गिरप्तार गरिएका आफ्ना नेता कार्यकर्तालाइ ससम्मान रिहाइ गर्न माग गर्दै देशब्यापी आन्दोलनका कार्यक्रम घोषणा गरेको हो ।