जहाजको अगाडिको ल्यान्डिङ गियरलाई ट्रकमा राखिएको छ। तर पछाडिको बायाँ पट्टीको इन्जिन पहिलेभन्दा झन् धस्सिएपछि रिकभरी टिम झस्किएको हो। थाइ इन्जिनियर, नेपाली इन्जिनियर र भारतबाट आएको टोलीबीच अब करी अगाडि बढ्ने भन्ने बारे साँझ छलफल भएको थियो।

नहाल्नु पर्ने ठाउँमा हात हालियो भन्दै भारतीय सैनिक टिम पनि निराश भएको प्राविधिक स्रोत बताउँछ।

नागरिक उड्डयन प्राधिकरणले जहाजको वजन १५० टनमात्र रहेको बताउँदै आए पनि प्राविधिक टिमका अनुसार त्यो १८० टन बराबरको छ।
इस्तानबुलबाट टिम आउँदै

भारतीय टिमले लत्तो छाडेपछि टर्किस एयरलाइन्सकै पहलमा इस्तानबुलबाट रिकभरी टिम आउने लगभग निश्चित भइसकेको छ। यताको टिमले अब सक्दैनौँ भन्ने बित्तिकै उताको टिम आउनेछ।

भारतीय वायुसेनाको रिकभरी टिम आउनुअघि नै टर्किस एयरलाइन्सले आफ्नो रिकभरी टिम ल्‍याउने प्रस्ताव गरेको थियो। प्राधिकरणका महानिर्देशक रतिशचन्द्रलाल सुमनका अनुसार भारतीय जहाज नै छिटो आइपुग्ने भएकोले इस्तानबुलको टिमलाई स्टायन्ड बाईमा राख्न भनिएको थियो।

अब इस्तानबुलबाट टिम नझिकाई नसकिने टुङ्गोमा अधिकारीहरु पुगेको प्राविधिक स्रोत बताउँछ।

यसले विमानस्थल खुल्ने समय झन् अन्यौल भएको छ। त्यसो त प्राधिकरण महानिर्देशक सुमनले शुक्रबार दिउँसोको पत्रकार सम्मेलनमा नै सञ्चारकर्मीहरुलाई शनिबार १० बजेपछि विमानस्थल खुल्ने भनेर समाचार नलेख्न सचेत गराएका थिए। ‘विमानस्थल खुल्ने ग्यारेन्टी गर्न सकिन्न’, उनले भनेका थिए।