काठमाडौं,१० फागुन । इंग्लिस प्रिमियर लिग फुटबलमा लिग लिडर चेल्सीलाई रेलिगेशनबाट बच्न संघर्षरत बर्नलेले बराबरीमा रोकेको छ । बराबरीसँगै लिग तालिकाको शीर्ष स्थानको चेल्सीले दुई अंक गुमाएको छ । यद्दपी, दोस्रो स्थानमा रहेको म्यानचेस्टेर सिटीसँग भने चेल्सीले ५ अंकको दुरी कायम राखेको छ ।

गएराति भएको खेलमा चेल्सीका ब्रानिस्लाभ इभानोभिचले पहिलो गोल गरेपनि बर्न्लेका बेन मीले एक गोल फर्काउँदै खेल बराबरी गरेका हुन् । ७० औँ मिनेटमा नेमान्जा माटिचले रातो कार्ड खाएपछि चेल्सी दश जनामा समेटिएको थियो ।
गएराति भएका अर्को खेलमा म्यानचेस्टर सिटीले न्यूकासल युनाईटेडलाई ५–० ले हरायो । म्यान्चेस्टर सिटीका लागि डेभिड सिल्भाले दुई गोल गरेभने सर्जीयो अगुएरो, सामिर नास्री र एडिन जेकोले एक एक गोल गरे ।
प्रिमियर लिग अन्तर्गतकै अर्को खेलमा आर्सनलले क्रिस्टल प्यालेसलाई २–१ ले पराजित गर्दा स्वान्सी सिटीले म्यान्चेस्टर युनाईटेडलाई २-१ ले हराएको छ ।
यसैगरी, स्टोक सिटीले एस्टन भिल्लालाई तथा हल सिटीले क्विन्स् पार्क रेन्जर्सलाई २–१ ले हराएका छन् । सण्डरल्याण्ड र वेष्ट ब्रोमले भने गोलरहित बराबरी खेलेका छन् । गएरातीका खेलहरुपछि लिग तालिकामा चेल्सी ६० अंकका साथ शीर्ष स्थानमा कायमै रहँदा म्यानचेस्टर सिटी ५५ अंकका साथ दोस्रो स्थानमा छ ।
४८ अंकका साथ आर्सनल तेस्रो स्थानमा पुग्दा म्यान्चेस्टर युनाइटेड ४७ अंकका साथ चौथो स्थानमा रहेको छ ।