नयाँ दिल्ली, २५ माघ । नयाँदिल्लीमा शनिबार विधानसभा निर्वाचन सम्पन्न भएको छ । निर्वाचनलगत्तै विभिन्न संस्थाले गरेको गरेको सबै एक्जिट पोलमा आम आदमी पार्टीले दिल्लीमा सरकार बनाउन आवश्यक बहुमत प्राप्त गर्ने देखिएको छ । सर्बेक्षणका अनुसार दिल्लीमा आम आदमी पार्टी (आप) का संयोजक अरविन्द केजरीवाललाई ५३ प्रतिशत मतदाताले रुचाएका छन् । इन्डिया टुडेले गरेको सर्वेक्षणअनुसार आम आदमी पार्टीलाई ३५ देखि ४३ सिट मिल्न सक्नेछ । सोही सर्बेक्षणअनुसार भारतीय जनता पार्टी (भाजपा) लाई २३ देखि २९ सिट र कांग्रेसलाई ३ देखि ५ सिट मिल्नेछ । यसअघिको विधानसभा निर्वाचनभन्दा आपलाई ८ प्रतिशत बढी मत मिल्नसक्ने दिल्लीमा गरिएका सर्बेक्षणले जनाएका हुन् । त्यस्तै अन्य सर्वेक्षणमा पनि आपको कम्तीमा ३५ सिट आउने देखिएको छ । दिल्लीमा ७० सिटका लागि निर्वाचन भएको थियो । शनिबार भएको मतदानमा ६७.०८ प्रतिशत मतदान भएको निर्वाचन आयोगले जनाएको छ। सबैभन्दा बढी उत्तर पूर्वी दिल्लीमा ६९.८७ प्रतिशत मतदान भएको छ।