ज्ञानमणि कालोटोपी

काभ्रे -काभ्रे  जिल्लाको गोकुले–९ स्थित सेतीदेवी प्राथमिक विद्यालयका विद्यार्थीहरु विद्यालय भवन भत्केपछि शौचालयको लागि बनाइएको भवनको चिसो भुर्इंमा पढ्न बाध्य भएका छन् ।

०७० को असारमा परेको अबिरल वर्षाका कारण विद्यालय भवन भत्केपछि त्यस यता विद्यार्थीहरु विद्यालयका लागि बनाइएको दुई कोठे शौचालयको भवनमा पढ्न बाध्य भएका हुन् । ‘स्थानीय जनश्रमदानबाट निर्माण गरिएको ३ कोठे विद्यालय भवन वर्षाका कारण भत्कियो भवन अभावका कारण शौचालयको लागि बनाइएको भवनमा विद्यार्थीहरुलाई पढाउनु पर्ने बाध्यतामा छौं ।’

विद्यालयका प्रधानाध्यापक दिलकुमार दुलालले भने । विद्यालय व्यवस्थापन समितिका अध्यक्ष ग्याम्सो वाइबाले विद्यालय भवन जिर्ण बन्दै गएपछि जिल्ला शिक्षा कार्यालयलाई पटक–पटक भवन निर्माणको लागि आग्रह गर्दा पनि वेवास्ता गरेको बताए । 

विद्यालय भत्केपछि चिसो भूईंमा बसेर पढन मन लाग्दैन कक्षा ४ की इन्दिरा मायाँ वाइबाले बताइन । ‘पहिले भवन राम्रो हुँदा पढन मन लागेको थियो, अहिले भूईंमा चिसो हुन्छ । टेबुल पनि राम्रो छैन , पढ्न साह्रै गाह्रो भइरहेको छ ।’ –उनले भनिन् । समाजसेवी बुद्धिमान वाइबाको पहलमा ०६५ सालमा अनुमति प्राप्त भई प्रावि सञ्चालन भईरहेको विद्यालय वर्षाको समयमा भत्केपछि जीर्ण बन्दै गएको थियो । भवन जीर्ण हुँदा समेत सम्बन्धित पक्षको वेवास्ताका कारण विद्यार्थीहरु शौचालयको भवनमा पढ्न बाध्य भएका हुन् ।
भवन अभावका कारण हाल ७१ जना विद्यार्थीहरु चिसो भुर्इंमै बसेर अध्ययन गरिरहेको स्थानीय अभिभावक प्रेमध्वज वाइबाले बताए । विद्यालयमा एक राहत कोटाको शिक्षक दरबन्दि र २ निजी स्रोतका गरी ३ शिक्षक र एक कार्यालय सहयोगी कार्यरत रहेका छन् । समयमै जिल्ला शिक्षा कार्यलयले विद्यालयको भवन नबनाउँने हो भने विद्यालयमा अध्ययनरत ७१ जना विद्यार्थीको भविष्य अन्यौलमा पर्ने अभिभावकहरुले बताएका छन् ।