रामेछाप ।   विद्यालयमा अध्यनरत छात्राहरु अकस्मात एकपछि अर्को हुँदै बेहोस हुनथालेपछि पकरवास गाविसमा रहेको प्रयागेश्वर उमावि एकसाताको लागि बन्द भएको छ । विद्यालय परिसरमा रुद्रीपुजा लगाएर मात्र विद्यालय खोल्ने तयारी भएको विद्यालय प्रशासनले जनाएको छ ।
विद्यालयका छात्राहरुमा एक्कासी रुने, कराउने, बर्बराउने, काम्ने, साथीसंगीलाई कुटपीट गर्ने र बेहोस हुनेजस्ता लक्षण देखापरेपछि विद्यालय प्रशासनले एकहप्ताको लागि विद्यालय वन्द गरेको विद्यालयका शिक्षक हरिनारायण श्रेष्ठले बताउनु भयो ।
श्रेष्ठका अनुसार शुक्रबारबाट एकपछि अर्को हुँदै छात्राहरु बेहोस हुन थालेका थिए । आइतबारदेखि क्रमशः अन्य विद्यार्थीहरुमा पनि उक्त रोग देखिएको हो । विद्यालयका छात्राहरुमध्ये कक्षा ८, ९ र १० मा अध्ययन गर्ने छात्रामा मात्र यो रोग देखा परेको छ ।
पढिरहेको बेला एक छात्रा बेहोस भएर ढल्ने वितिक्कै अन्य साथीहरु पनि एकपछि अर्को ढल्दै जाने गरेपछि विद्यालय प्रशासनले नजिकैको स्वास्थ्य चौकीवाट स्वास्थ्यकर्मी ल्याएर छात्राहरुको स्वास्थ्य परिक्षण समेत गराएको छ । स्वास्थ्य परिक्षणमा संलग्न पकरवास स्वास्थ्य चौकीका इन्चार्ज ओमप्रकास श्रेष्ठले छात्राहरुमा मासहिस्टोरियाको लक्षण देखापरेको बताउनु भयो ।
यसरी एकाएक विद्यालयमा अध्ययरत छात्राहरुमा नयाँ प्रकृतिको रोग देखापरेपछि विद्यालय प्रशासनले विद्यालय परिसरमा रुद्रीपुजा लगाएर मात्र विद्यालय खोल्ने तयारी गरेको प्रयागेश्वर उमाविका प्रअ चन्द्रप्रकास गौतमले जानकारी दिनु भयो ।रासस