काठमाडौँ । काठमाडौँको गोकर्णेश्वर नगरपालिका–३ स्थित गाम्छामा माकल बालेर सुतेका कारण ३ जनाको मृत्यु भएको आशंका गरिएको छ । गाम्छामा ३३ वर्षीया सीता दंगाल नगरकोटी, १५ वर्षीया छोरी अंशु नगरकोटी र दुई महिने बालक मृत अवस्थामा भेटिएका हुन् ।

ढोका थुनेर बसेको र घटनास्थलमा माकल बालेको भेटिएको अनुसन्धानमा संलग्न उपत्यका अपराध अनुसन्धान कार्यालयका एकजना अधिकृतले रातोपाटीलाई बताए । ती अधिकृत भन्छन्, ‘दुई महिनाको बच्चा भएको कारण कोठा तातो बनाउन माकल बालेको र निसास्सिएर मृत्यु भएको हुनसक्ने हाम्रो आकलन छ ।’

ढोकामा भित्र र बाहिर दुवैतिरबाट लगाउन मिल्ने लक सिस्टम रहेको र ढोका बन्द भएको देखेपछि मृतकका पति कान्छा नगरकोटी कार्तिक १६ बाट घरमा गएका थिएनन् । ढोका बन्द गरेर पत्नी सम्पर्कविहीन भएको भन्दै उनले प्रहरीमा खोजतलास निवेदन दिएको अनुसन्धान अधिकृतहरु बताउँछन् ।

घटना दुइसाता पुरानो भएको अनुसन्धान अधिकृतहरु बताउँछन् । घटनास्थलमा त्रिवि शिक्षण अस्पतालका फरेन्सिक विज्ञहरु पनि पुगेर हेरेका छन् । अनुसन्धानमा संलग्न अधिकृत भन्छन्, ‘शव गलिसकेको अवस्था छ, चिकित्सकहरूले पनि ती शव कम्तीमा दुईसाता पुरानो हुनसक्ने बताएका छन् ।’