काठमाडौँ । गोकर्णेश्वर नगरपालिकाले नयाँ आधुनिक भवनबाट आफ्ना नागरिकताको उपचारको थालनी गरेको छ। नगरप्रमुख दीपककुमार रिसालले अस्पतालको नयाँ भवन बिहीबार उद्घाटन गरेका छन् । नगरप्रमुख रिसाल र उपप्रमुख सान्नानी लामाले संयुक्त रूपमा उद्घाटन गरेको भवनले सेवा दिन सुरु गरेको र आधुनिक सबै सेवा उपलब्ध गराउने मेयर रिसालले दाबी गरे ।

“यो नयाँ अस्पताल भवनले गोकर्णेश्वरका स्थानीय बासिन्दाको स्वास्थ्य सेवामा महत्त्वपूर्ण सुधार ल्याउनेछ । अस्पतालको स्वास्थ्य सेवा अझै गुणस्तरीय र सुलभ बनाउन हामी प्रतिबद्ध छौँ ” मेयर रिसालले भने ।

२०७६ असार १६ गते बागमती प्रदेशका तत्कालीन मुख्यमन्त्री डोरमणि पौडेलले गोकर्ण स्वास्थ्य चौकीलाई गोकर्ण प्राथमिक अस्पतालको रूपमा उद्घाटन गरेका थिए । त्यसै वर्षको नगर परिषद् बैठकले प्राथमिक अस्पताललाई १५ शय्याको नगर अस्पतालको रूपमा परिमार्जन गर्ने निर्णय गरेको थियो । उक्त नगरले केही समय अघि आधुनिक भवन पनि शिलान्यास गरेर निर्माण गरी रहेको छ। उक्त भवन निर्माण हुनुअघि १५ शय्याको भवन सञ्चालनमा ल्याएको हो ।

देशभर नै उत्कृष्ट स्वास्थ्य सेवा दिएर चर्चामा आएको गोकर्णेश्वरले प्राथमिक स्वास्थ्य केन्द्रबाट नागरिकको उपचार सुरु गरेको थियो । यो सेवा विस्तारको क्रम चलिरहेको र आफ्नो कार्यकालको अन्तिमसम्म सर्वसुलभ रूपमा नागरिकलाई स्वास्थ्य उपचार गराउने मेयर रिसालले बताए ।

उनले सबै नगरवासीको बिमा कार्यक्रम सफलतापूर्वक अघि बढेकाले अबको दुई वर्षमा सबैलाई निःशुल्क स्वास्थ्य सेवा दिने आफ्नो लक्ष्य पुरा हुने बताए । नगरपालिकाले २८ करोड लागतमा गोकर्णेश्वरको वडा नम्बर ४ स्थित जगडोलको शहिदपार्क मुकेश कायस्थ हेड इन्जुरी सेन्टरको पनि निर्माण धमाधम भइरहेको छ।