२७० वर्षदेखी कायम नेपाली राज्य औपनिवेशिकतालाई २१औं शताब्दीको प्रारम्भिक दशकमा आएको संघीय लोकतान्त्रिक गणतन्त्रले पनि निरन्तरता दिई रहेको छ । गोर्खाली सत्तामा राजाहरूको शासन केवल वंशको निम्ति, राणाहरुको शासन जहानको निम्ति, प्रजातन्त्रदेखि गणतन्त्रसम्मको शासन केवल एउटा नश्लको निम्तिमात्र आत्म गौरबको सत्ता बनाइयो । विगतदेखी कायम औपनिवेशिकता मार्फत राज्यविहिन तुल्याइएका नेवाः लगायत स्वदेशी राष्ट्रहरूको आत्मसम्मान जगाउन भाषा,धर्म,संस्कृती,भूमी,सम्पदा लगायत माथी भईरहेको विभिन्न अतिक्रमण विरुद्ध आन्दोलनहरू निरन्तर रुपमा आज पनि कायम छ । दुर्भाग्य आन्दोलनहरूले ठोस उपलब्धी दिन सकेको छैन । सन् १९२६ मा नेपाल भाषा विकास मण्डल(नेपाल भाषा अभियान)ले चलाएको आन्दोलन देखी लाखौ नेवाःहरू सडकमा उक्रिएर गुठी विधेयक खारेज गरेता पनि नेवाः राष्ट्रकोे सत्तामाथि झुन्डिएको तरबार हटेको छैन । वर्तमानको औपनिवेशिक राज्यसत्तालाई नै सहमती उत्पादन गर्ने आन्दोलनको गोलचक्करबाट मुक्त गरेर राष्ट्रिय मुक्ति क्रान्ति सम्पन्न गर्न, राज्यविहिन तुल्याएका हिमाल, पहाड, तराई, मधेश लगायत विभिन्न राष्ट्रका सुशासन र सम्वृद्धि चाहने बहुलराष्ट्रियताहरू सबै संयुक्त रुपमा एकताबद्ध भई बहुलराष्ट्रिय राज्य निर्माण गर्नु अति आवश्यक भैसकेको छ ।

बहुलराष्ट्रिय राज्य नेपालमा मात्र नेवाः लगायत राज्यविहिन राष्ट्रहरूले संघीय लोकतान्त्रिक गणतन्त्रमा निहित औपनिवेशिकतालाई अन्त्य भएको महसुस गर्नेछ । यही क्रान्तिले देशमा सबै नेपालीका लागि शासन र संविधानमा परिवर्तन ल्याउने छ र नेपाल सबै नेपालीका लागि निर्माण गर्नेछ । यो क्रान्ति कुनै एक दल वा समुदायबाट सम्भव नै छैन तसर्थ विद्यमान सम्पूर्ण परम्परागत पार्टीबाट माथि उठी राज्यविहिन तुल्याएका राष्ट्रका सम्पूर्ण जनता जुटेर गौरवशाली नयाँ नेपाल साझा नेपाल निर्माण सम्भव छ ।

वि.स. १८२५ यता हामी नेवाहरू हाम्रै भूमीमा पराया भएका छौं । किर्तिपुरमा काटिएका १७ धार्नि नाक र कान खोज्ने हिम्मत हामीले गर्न सकेका छैनौं । किर्तिराज्य लक्ष्मीका सपनाहरू पुरा गर्ने तथा गोर्खालीको नेवाः राष्ट्रको इतिहास, संस्कृति, भाषा लगायत समग्र सभ्यतामाथि गरेको अतिक्रमणले सिमा नाघेको छ । राष्ट्रिय विभुती शंखधर शख्वाले जस्तै गोर्खाली सत्ताले दिन प्रतिदिन गरिरहेको अतिक्रमण तथा लुटको अन्त्य गर्दै पुर्खाहरूको सत्व र स्वाभिमानलाई बोकेर नेवाः राष्ट्रलाई एकल राष्ट्रिय राज्यको ऋणबाट मुक्त बनाउनु आजको नेवाः पुस्ताको दायित्व हो । पुर्खाले सुम्पिएको यस दायित्व पुरा गर्दै हाम्रो शिर उच्च बनाउने यस महान अभियानमा सरिक हुन आम नेवाः लगायत सम्पूर्ण राज्यविहिन राष्ट्रका जनताहरूलाई हार्दिक आह्वान गर्दछांै ।

नेपाल संवत ११४४ चिल्लागा(२०८० चैत्र २३)

सुमन सायमी

संयोजक

नेवाः राष्ट्रिय परिषद

रविन्द्र कुमार श्रेष्ठ

संयोजक

स्वनिगः(उपत्यका) विशेष ब्यूरो