काठमाडौँ । बहालमा रहेका दुई मन्त्री जोडिएको ‘हाम्रो नयाँ कृषि सहकारी संस्था लिमिटेड’ गीतेन्द्रबावु (जीबी) राईले खरिद गरेको भेटिएको छ । ऊर्जा, जलस्रोत तथा सिँचाइमन्त्री शक्तिबहादुर बस्नेत र श्रम रोजगार तथा सामाजिक सुरक्षा मन्त्री डोलप्रसाद (डीपी) अर्याल संलग्न भनिएको सो सहकारी राईले ७ महिनाअघि खरिद गरेका हुन् ।

पोखरास्थित सूर्यदर्शन सहकारीसमेत संस्थापक अध्यक्ष रहेका राई अहिले फरार छन् । उनीविरुद्ध बचतकर्ताको रकम अपचलन गरेको कसुरमा अन्तर्राष्ट्रिय प्रहरी संगठन ‘ईन्टरपोल’बाट डिफ्युजन नोटिस जारी गरिएको छ ।

सहकारी विभागको आग्रहमा सीआईबीले हाम्रो नयाँ कृषि सहकारीको निक्षेप अपचलनबारे अनुसन्धान गरिरहेको छ । हालसम्म ४ जना बचतकर्ताले सीआईबीमा जाहेरी दिएका छन् । प्रारम्भिक अनुसन्धानबाट ३ करोड रकम अपचलन भएको देखिएको अनुसन्धानमा संलग्न अधिकृतहरू बताउँछन् । भूमि व्यवस्था, सहकारी तथा गरिबी निवारण मन्त्रालयले माघ ११ मा सो सहकारीलाई समस्याग्रस्त घोषण गरेको थियो ।

२०७७ फागुनमा सहकारी स्थापना हुँदा मन्त्री बस्नेत संस्थापक अध्यक्ष थिए । सहकारीको कार्यक्षेत्र देशभर हुनेगरी नक्सालमा मुख्य कार्यालय स्थापना गरेर सहकारी सुरु भएको कागजातबाट देखिएको छ । त्यसपछि बस्नेत मन्त्रीमा नियुक्त भएपछि उनले पत्नी सत्य पहाडीलाई जिम्मेवारी हस्तान्तरण गरेर बहिरिएको भेटिएको छ ।

सहकारीमार्फत बर्दियामा स्लटर हाउस ‘वधशाला’ स्थापना गरिएको थियो । तर, कोभिड–१९ को संक्रमण सुरु भएसँगै वधशाला सञ्चालनमा समस्या आयो । काठमाडौँमा सहकारी राखेको फ्ल्याटको भाडा र कर्मचारीलाई दिनुपर्ने तलब रकम करिब ३ करोड पुगेपछि सहकारीमा समस्या आएको अनुसन्धानमा संलग्न अधिकृतहरू बताउँछन् ।

डीपी अर्याल उक्त सहकारीमा उपाध्यक्ष थिए । रास्वपाका सह–महामन्त्री कविन्द्र बुर्लाकोटीले संचालक समितिमा बसेर काम गरे । कार्यालय सञ्चालनमै समस्या देखिएपछि जीबी राईले सहकारी खरिद गरे । कार्यक्षेत्र देशभर भएको हुनाले राईले सहकारी खरिद गरेको अनुसन्धानमा संलग्न अधिकृतहरू बताउँछन् । सहकारी प्रकरणमा मुछिएका बहालवाला दुई मन्त्री बस्नेत र अर्यालले रकम अपचलन गरेको कुनै आधार नभेटिएको सीआइबीका एक अनुसन्धान अधिकृतले बताए ।