काठमाडौं,२० कार्तिक  । उद्योगमन्त्री महेश बस्नेतले औद्योगिक व्यवसाय ऐनको माध्यमबाट पर्यटन क्षेत्रलाई राष्ट्रिय उद्योगको मान्यता दिलाउने काम भइरहेको बताएका छन् ।    

प्रस्तावित औद्योगिक व्यवसाय ऐनमा पर्यटनलाई राष्ट्रिय प्राथमिकता प्राप्त उद्योगको रुपमा परिभाषित गरेको बस्नेतको भनाई छ । उनका अनुसार ऐनमा पर्यटनका विभिन्न पक्षहरु ट्रेकिङ, ट्राभल, राफ्टिङ, होटल क्यासिनोहरुको दायराहरुलाई स्पष्ट रुपमा परिभाषित गरिएको छ ।

गन्तव्य नेपालले बिहीबार राजधानीमा आयोजना गरेको पर्यटन ऐनमा व्यवसायीक समस्या विषयक अन्तरक्रिया कार्यक्रममा बोल्दै मन्त्री बस्नेतले राष्ट्रिय प्राथमिकता प्राप्त उद्योगहरुलाई भन्सार, भ्याट, आयकरलगायतमा छुटको व्यवस्था समेत गरिएको बताए ।

पर्यटन ऐनमा मात्रै नभएर व्यवसायीक र व्यवहारिक समस्याहरु पनि रहेकोले त्यसतर्फ सबैलाई ध्यान दिन बस्नेतले आग्रह गरे ।

उद्योगधन्दालाई अगाडि बढाउनको लागि दीर्घकालिन योजना नीति निर्माताहरुमा नभएको मन्त्री बस्नेको जिकिर थियो । ‘जसमा हुनुपर्ने हो त्यसमा अझ छैन’ उनले थपे- ‘उद्योग तथा पर्यटनजस्ता मन्त्रालयहरु अझै पनि कम प्राथमिकतामा पर्छन्, राजनीतिक अस्थिरताका कारण नेपालका मन्त्रीहरु पनि स्वयं पर्यटकजस्तै बनिरहेका छन ।’

कार्यक्रममा पर्यटन विभागका महानिर्देशक तुल्सीप्रसाद गौतमले पर्यटन व्यवसायीहरुसँगको सहकार्यमा मात्रै पर्यटन ऐन संशोधन सम्भव भएको बताउँदै पर्यटन ऐन संशोधनको लागि विभागले बृहत छलफलको वातावरण तयार पार्ने बताए ।

महानिर्देशक गौतमले पर्यटन क्षेत्र देशको मेरुदण्ड भएकोले यसलाई समयसापेक्षित रुपमा विकास गर्नको लागि सबैले आ-आफ्नो ठाउँबाट भूमिका खेल्नुपर्नेमा पनि जोड दिएका छन् ।

गन्तव्य नेपालका अध्यक्ष शिव अधिकारीले देशको पर्यटन विकासका निम्ति पर्यटन ऐन संसोधन अहिलेको पहिलो आवश्यकता भएको जिकिर गर्दै यसको लागि सरकार, पर्यटन व्यवसायी र सरोकारवाला निकायहरु एकजुट भएर अघि बढ्नुपर्ने बताए ।

नेपाल एसोसिएशन अफ टुर एण्ड ट्राभल एजेन्ट -नाट्टा)का अध्यक्ष डिबी लिम्बुले मुलुकको विद्यमान पर्यटन ऐन र यातायात व्यवस्था ऐनमा पर्यटन शब्दको परिभाषा बाझिएको हुनाले त्यसको संसोधन गरी आन्तरिक तथा वाहृय पर्यटकलाई समान व्यवहार गर्नुपर्नेमा जोड दिएका थिए ।

अहिलेको पर्यटन नियमावलीले व्यवस्था गरेको ट्राभल, टे्रकिङ कम्पनीहरुको इजाजत खारेजी सम्बन्धि नियमलाई अविलम्ब सुधार गर्नुपर्ने बताउँदै लिम्बुले राज्यलाई नियमित राजस्व तिर्ने कम्पनीहरुको इजाजत नवीकरण गर्न पाउने व्यवस्था लागु गर्ने र अद्यावधिक प्रतिवेदन ६/६ महिनामा नभई वाषिर्क बनाउनुपर्नेमा जोड दिए ।

नेपाल पर्यटक यातायात व्यवसायी संघका पूर्व अध्यक्ष रामहरी शर्माले देशको पर्यटन विकास गर्ने भनेर मात्रै केही नहुने भन्दै पर्यटन यातायात क्षेत्रमा देखिएको समस्याहरुको समाधामा राज्य पक्ष गम्भिर हुनुपर्ने बताए ।

शर्माले अहिले पर्यटकीय पूर्वाधारहरु निर्माण हुन नसकेको र पर्यटक यातायात क्षेत्रमा देखिएको समस्या, टर्मिनलको समस्याहरुको समाधान गर्नुपर्ने अहिलेको टड्कारो आवश्यकता रहेको बताएका थिए ।

ठमेल पर्यटन विकास परिषद्का अध्यक्ष रामशरण थपलियाले देशको पर्यटन विकास गर्नको लागि पर्यटन ऐनलाई समयसापेक्षित बनाउनुपर्नेमा जोड दिए । टुरिष्ट गाइड एसोसिएशन नेपालका अध्यक्ष हरेराम बरालले संख्यात्मक भन्दा पनि गुणात्मक पर्यटक बढाउने खालको ऐन कानुन बनाउनुपर्ने अहिलेको आवश्यकता रहेको बताए ।समारोहमा युवा पर्यटन व्यवसायी शान्त शर्मा र पर्वतारोही दावा छिरी शेर्पालाई सम्मान गरिएको छ ।

कार्यक्रममा गन्तव्य नेपाल पत्रकारिता कल्याणकारी कोषबाट सगरमाथा आरोहण अभियान अन्तर्गत मेरा पीक आरोहणको क्रममा अस्वस्थ भई अस्पताल भर्ना भएकी पत्रकार कल्पना महर्जनको उपचारार्थ २५ हजार रुपैयाँ को चेक नेपाल पर्यटन पत्रकार मञ्च -टीजेएफ-नेपाल)लाई प्रदान गरिएको थियो ।

सोही अवसरमा विभिन्न पर्यटकीय संघसंस्था तथा व्यक्तिहरुले पनि सहयोग प्रदान गरेका थिए । त्यससँगै नेपाल पर्यटन पत्रकार मञ्च -टीजेएफ-नेपाल)ले सञ्चालन गरेको पत्रकार महर्जनको उपचारार्थ सहयोग रकम १ लाख ५ हजार १० रुपैयाँ भएको छ ।