rastriyakhabar
डा. धर्मागत भट्टराई
न मेरुदण्ड छ, न छ कुनै शीर नाम !
म र तँ मुर्कट्टा बेनाम !
छोटे नाङ्गा बादशाहहरुसामु यो लाम !
सलाम ! हामी मुर्कट्टाहरुको सलाम !
डा. धर्मागत भट्टराई
न मेरुदण्ड छ, न छ कुनै शीर नाम !
म र तँ मुर्कट्टा बेनाम !
छोटे नाङ्गा बादशाहहरुसामु यो लाम !
सलाम ! हामी मुर्कट्टाहरुको सलाम !
म गीत गाउँछु, यो ताली ठोक्छ !
ऊ त लुटज्यूलाई खोला तार्न काँधमै बोक्छ !
हारेर के भो त ? ख्वामित् ! पछिल्तिर ढोका छ, छिर्नुहुन्छ, कसले खोक्छ ?
झुटज्यूको गनगन भाषण र लुटज्यूको अनवरत शासन
र दुवै बोक्ने बन्धकी पजेरोलाई
डडाल्नो भाँचिने गरी बोकेपछि नसकेर
टेकेको भुइँ फतक्क गल्छ !
खाएर नअघाउने ढुंगाहरु चढेको पेट्रोल गाडीसामु
अघाउन्जेल खान नपाएर आक्रान्त जीवन पेट्रोल खन्याएर जल्छ !
पेट पाल्न पाउँ भन्ने युवा परान
बन्दुकको मुखसामु अनाहक रक्ताम्मे ढल्छ !
दशलाख मुल्य भएका तँ, म, ऊ सबको टाउको गुम छ,
अहँ, कोही, चुँ बोल्दैन ! तव त क्रान्ति फल्छ !
स्याबास ! चिच्याऊ, नेता भइन्छ !
गाऊ यो शान !
ताली बजाऊ- ताला लागेको विज्ञान !
मनाऊ उत्सव- नउदाउने विकासको
बनाऊ शब्दचित्र- तिम्रो र मेरो आश र लासको
गर्व गर, निशेष लिलाम !
हामी मुर्कट्टाहरुको स्वदेशी सलाम !
थाहा छैन मलाई समयले जलाउँदैछ या मैले समयलाई
बुझ्दिन हामी वंशाणुगत यही हौँ या भिजेका सलाई !
बालुवाटार या बिमानै निलेर नचाए पनि; सुनको पहाडै छलेर पचाए पनि
या शरणार्थी बनाएर बेचे पनि; या हत्यारा छुटेर खुलेआम किचे पनि
यहाँ सब चकाचक छ हजुर, सब गजब !
हामी मान्छे हौँ या बस् १ भोट मुर्कट्टा ? !
बस्, पाँच वर्षमा ठप्पा ठोक्ने १ ज्यान ? !
न सास, न स्मृति परान ! न रहलपहल आत्मसम्मान !
एक जागिरको ललिपप या आश्वासनजतिकै हलुङ्गो !
एक हजारको नोट या एकछाक मासुको डढेको अंगारे फिलिंगो !
के अर्थ छ हे तिम्रो र मेरो भोटको ?
जहाँ हारेकाहरू विजय बिल्ला भिरी शासन गर्छन् I
के अर्थ छ हे बन्धकी नोटको ?
जहाँ छोराहरु आफ्नैको गोलीले अकाल मर्छन् I
अब बन्द कक्षा र रक्ताम्मे प्राध्यापकबाटै जीवन सिकाउन पाइनेरै’छ I
लेखेर बेचिनपर्ने पानाहरू बिकेर लेखिन थालेपछि
हरचिज बिकाउन पाइनेरै’छ !
देशलाई चोक्टा चोक्टा पारेपछि
कुर्सीमा नाता टिकाउन पाइनेरै’छ !
जति देश भड्खालोमा भए पनि
क्यामेराले तिम्रो समाचार भजेकै छ
न्याय निलियोस् या हाम्रो माटो; सास थुनियोस् या हाम्रो बाटो
२३ किलोको माला तिम्रो गलामा सजेकै छ
दूतसंग बन्द कोठामा सम्झौता भए पनि तिमी नडराऊ
‘महान नेता’वाला स्तुति हामी मनाउनेछौं
तिमीलाई युगदूत भनाउनेछौं
हामीलाई हामीमा अग्घोर गर्व छ
यो देश मुर्कट्टाहरुको देश बनाउनेछौं
चाहे म डब्बाभित्रै किन नफर्कुं !
हामी मुर्कट्टा तिमीलाई जम्ल्हात खन्याउनेछौं
तिमी ढुक्क भएर खाउ, पिउ, गुड !
सपरिवार उड, सदाबहार उड !
तिमी मन लाग्दा गोली हान्दिनू !
बस्, दश लाख न हो मेरो दाम !
भर्सेला परुन् स्वदेशी सपनाहररू !
हामी जाउँला तिनको मलाम !
तिमी हाम्रो नेता
सलाम ! हामी मुर्कट्टाहरुको सलाम !
साभार =बाह्रखरी डटकम
प्रतिक्रिया