नयाँ दिल्ली । केही दिनअघि मात्रै सलमान खानका भाइ अरबाज खानले ५६ वर्षको उमेरमा दोस्रो बिहे गरे । बलिउडका मोस्ट एलिजेबल ब्याचलर सलमान खानले कहिले बिहे गर्छन् भन्ने कुरा सधैँ चर्चाको विषय हुने गरेको छ । सलमानले कहिले र कोसँग बिहे गर्छन् ? यो प्रश्नको जवाफ त उनका सारा फ्यानहरु जान्न चाहन्छन् ।

यति बेला सलमान उनले होस्ट गर्दै आएको रियालिटी शो बिग बोस १७ का कारण चर्चामा छन् । बिग बोसको वीकेन्डका वारको एपिसोड अहिले व्यापक रुपमा भाइरल भइरहेको छ । यसमा सलमानले आफ्ना बिहेबारे रमाइलो अपडेट दिएका थिए । यो एपिसोडमा बलिउड अभिनेत्री तब्बु आएकी थिइन् । एक अर्कासँग मस्ती मजाक गर्दै दुवै स्टारले आ–आफ्नो बिहेबारे चर्चा गरेका थिए ।

भिडियोमा तब्बु भन्छिन्, ‘म र सलमान बिहे गरिरहेका छैनौं, अनि आफ्नो भागको बिहेको फेरा पनि अरुलाई गराइरहेका छौँ ।’ बिग बोसमा प्रवेशको बेलामा सलमानले कन्टेस्टेन्टहरु अंकिता लोखन्डे र उनको पति विक्कीको बिहे गराएका थिए । शोमा तब्बुले तिमीहरुले बिहे गरेर निस्की सक्यौँ अब हामी बाँक छौँ भनेकी थिइन् । यही बेला सलमानले जिस्किँदै हामी बिहे अवश्य गर्छौ भन्छन् ।

‘हामी ह्विल चेयरमा बसेर बिहे गर्नेछौँ अनि आगोमा जानेछौँ,’ अभिनेताले भने । सलमानको यो कुरा सुनेर सबै जना गलल्ल हाँसेका थिए । सलमान हालै टाइगर ३ मा देखिएका थिए । सलमानको भाइ अरबाजले हालै मात्र शूरा खानसँग दोस्रो बिहे गरेका थिए । सलमानले कोसँग र कहिले बिहे गर्छन् भन्ने चाँहि अहिलेसम्म पनि सस्पेन्स नै छ ।