काठमाडौं । नेकपा (एमाले)का अध्यक्ष केपी शर्मा ओलीले आफूहरूमाथि दश दिशाबाट हमला भएको र जिउँदै खाएर सिद्याउन खोजिएको दाबी गरेका छन्।

मङ्गलबार काठमाडौंमा आयोजित जनसंगठन पदाधिकारी भेलामा बोल्दै अध्यक्ष ओलीले आफूहरूमाथि दश दिशाबाट हमला भएको र जिउँदै खाएर सिद्याउन खोजिएको दाबी गरेका हुन्।

ओलीले भने, ‘हामीले यो दुई वर्षमा धेरै भयानक हमला, चारै दिशाबाट मात्रै हैन दसै दिशाबाट हामीमाथि तीव्र हमला भयो। हामीलाई सिध्याउन दशैँ दिशाबाट हमला भयो। तलमाथि, वरपर, पूर्व पश्चिम, उत्तरदक्षिण कुनाकुना कतै बाँकी नराखेर चौतर्फी हमाल भयो। हुँडारको बथान जस्तो कसैले खुट्टा टोक्छ, कसैले हात टोक्छ, कसैले टाउकोतिर टोक्छ। हीही गरेर कराएर झम्टिए। जिउँदै खाएर सिद्याउन खोजियो।’

उनले त्यस्तो प्रतिकुल २ वर्षको अवस्थामा पनि पार्टी जोगाएको र पार्टीलाई पुनर्जीवित गराएको बताए।