रसियन राजदुतले  भाइटिका महोत्सवमा टिका ग्रहण गर्न पाउँदा आफूलाई नौलो अनुभुति भएको प्रतिक्रिया दिनुभयो । रंगीविरंगी टिका, मानिसहरुको सौहार्दपूर्ण व्यवहार र देउसी भैलो खेल्ने परम्पराबाट म साँच्चै नै प्रभावित भएँ,  पहिला आउँदा पनि मलाई भाइटिका बारे केही थाह थियो तर यो पटक सहभागी भएर टिका नै लगाउन पाउँदा रमाइलो लाग्यो, उहाँले भन्नुभयो । टिका लगाउने बेला तोरीको तेलमा डोवेको दुवो टाउकोमा घुमाएको, कलसमा पानी लिएर सहभागीलाई गोलाकार घेराले छेकेको अनि सयपत्री माला पहिरिएको अनुभव आफूले भुल्न नसक्ने उहाँले बताउनुभयो ।

देशविदेशमा नेपाली परम्परा र संस्कृतिको प्रचारप्रशार तथा यसैको माध्यमबाट बढी भन्दा बढी पर्यटक नेपाल भित्र्याउने उद्धेश्यका साथ आयोजना गरेको शिब अधिकारीले जानकारी दिनुभयो । आपसी भाइचार बढाउन समेत सघाउने यसप्रकारको महोत्सवलाई आगामी वर्षहरुमा पनि  निरन्तरता दिने उहाँले जानकारी दिनुभयो । विदेशीहरुलाई टिका लगाइदिएपछि नेपाली परम्परा अनुसार सेलरोटी, तरकारी, अचार र अन्य उपहारहरु विदेशी दाजूभाइ तथा दिदी बहिनीलाई प्रदान गरिएको थियो ।